इमारत भाड्याबाबत मनपाला आदेश

म. टा. प्रतिनिधी, जळगाव

महापालिकेची आर्थिक स्थिती बिकट असल्याकारणाने शिक्षकांचे १४ महिन्यांचे ५० टक्के वेतन थकले आहे. त्यामुळे शिक्षकांनी आयुक्तांविरुद्ध दाखल केलेल्या याचिकेवर औरंगाबाद खंडपीठात कामकाज झाले. दरम्यान, मनपा शाळेच्या इमारतीचे ६ कोटींचे थकित भाडे सरकारने द्यावे आणि या निधीतून शिक्षकांचे थकित वेतन करावे, असे आदेश न्या. कोरडे, न्या. बोरा यांनी आयुक्तांना दिले आहेत.

जळगाव मनपाची आर्थिक स्थिती बिकट असल्याने जोपर्यंत ती सुधारत नाही तोपर्यंत ५० टक्केच वेतन देण्याबाबतचा धोरणात्मक निर्णय महासभेत घेण्यात आला होता. त्यानुसार शिक्षकांचे १४ महिन्याचे ५० टक्के वेतन महापालिकेकडे थकले आहे. ते वेतन मिळावे यासाठी शिक्षकांनी औरंगाबाद खंडपीठात याचिका दाखल केली होती. यावर खंडपीठाने वेतन देण्याबाबत आदेश देऊनही आयुक्तांनी वेतन दिले नाही. त्यामुळे शिक्षकांनी पुन्हा आयुक्तांविरुद्ध अवमान याचिका दाखल केली.