गाळेधारकाच्या विषयांत आयुक्तांच्या भूमिकेकडे लक्ष

थकबाकीसाठीच्या मुदतीचे दोनच दिवस शिल्लक

म. टा. प्रतिनिधी, जळगाव

मनपा मालकीच्या मुदत संपलेल्या व्यापारी संकुलातील गाळेधारकांना थकीत भाडे भरण्यासाठी आयुक्तांनी १५ दिवसांची मुदत दिली. या मुदतीतील १३ उलटूनही गाळेधारकांनी अद्याप थकबाकी रक्कमा न भरल्याने दोन दिवसानंतर आयुक्त काय भूमिका घेतात याकडे गाळेधारकांसह जळगावकरांचे लक्ष लागून आहे.

मनपा मालकीच्या १८ व्यापारी संकुलातील २३८७ गाळ्यांची मुदत संपुष्टात आली आहे. गेल्या ६ वर्षांपासून गाळ्यंचा प्रश्‍न प्रलंबित आहेत. औरंगाबाद खंडपीठाने गाळे ताब्यात घेऊन कार्यवाही करावी, असे स्पष्ट आदेश दिले आहे. मात्र, प्रशासनाकडून कारवाईला दिरंगाई केली जात आहे. दरम्यान, १२ दिवसांपूर्वी आमदार सुरेश भोळे यांच्यासह गाळेधारकांच्या शिष्टमंडळांनी आयुक्त चंद्रकांत डांगे यांची भेट घेऊन चर्चा केली. आयुक्त डांगे यांनी थकीत भाडे भरण्यासाठी १५ दिवसांची मुदत दिली आहे. दिलेल्या मुदतीनुसार केवळ २ दिवस उरले आहेत. तरी एकाही गाळेधारकांनी थकीत भाडे भरलेले नाही. त्यामुळे दोन दिवसानंतर आयुक्त काय भूमिका घेतात? याकडे आता लक्ष लागले आहे.


...तर स्थायी सभापतींच्या अध्यक्षतेखाली महासभा
महानगरपालिकेच्या महासभेपूर्वी प्रभारी महापौर गणेश सोनवणे यांनी राजीनामा दिल्यामुळे सभेबाबत संभ्रम निर्माण झाला आहे. स्थायी समिती सभापतींकडून प्रस्ताव आल्यास महासभा घेण्याबाबत निर्णय घेतला, अशी माहिती आयुक्त चंद्रकांत डांगे यांनी दिली. महासभा रद्द झाल्यास स्थायी समितीची सभादेखील होणार नसल्याची माहिती मनपातील सूत्रांनी दिली आहे. महापालिकेला मिळालेल्या २५ कोटींच्या मुख्यमंत्री निधीतील ७ कोटींच्या कामांसह काही आवश्यक कामांना मान्यता घेण्यासाठी प्रशासनाकडून महासभा घेण्याचा तयारी होती. प्रभारी महापौर गणेश सोनवणे हेदेखील महासभेबाबत आग्रही होते. मात्र, अचानक प्रभारी महापौर गणेश सोनवणे यांनी राजीनामा दिल्याने ही संभाव्य महासभा बारगळली. आता स्थायी सभापती यांनी प्रस्ताव दिल्यास महासभा होण्याची शक्यता आहे. अन्यथा महापौर निवडीनंतर सात दिवसाच्या आत महासभा होण्याची शक्यता आहे.