‘न्हाई’कडून हॉकर्सना अखेरचा इशारा

म. टा. प्रतिनिधी, जळगाव

शहरातील समांतर रस्त्यांसाठी महामार्ग प्राधिकरणाने (न्हाई) २७ व २८ फेब्रुवारीला महामार्गावरील अतिक्रमण काढण्याच्या निर्णय घेतला आहे. त्यासाठी मोजणीचे काम सुरू करण्यात आले आहे. महापालिकेनेच सागर पार्कवरील हॉकर्सला आयटीआयजवळ स्थलांतर केले होते. या ३० हॉकर्सला ‘न्हाई’ने आता हातगाड्या हटविण्याच्या सूचना दिल्याने हवालदिल झालेल्या विक्रेत्यांनी शुक्रवारी अतिक्रमण अधीक्षक एच. एम. खान यांची भेट घेतली.

बायपास महामार्गाच्या चौपदरीकरणाचे काम मार्चमध्ये सुरू करण्यात येणार आहे. तसेच शहरातील महामार्गावरील अतिक्रमण २८ फेब्रुवारीपासून काढण्यात येणार असल्याचे नुकतेच महामार्ग प्राधिकरणाच्या अधिकारी व आमदारांच्या बैठकीत ठरले होते. त्यानुसार ‘न्हाई’कडून महामार्ग व समांतर रस्त्यांच्या मोजणीचे काम सुरू करण्यात आले आहे.

२७ फेब्रुवारीपासून महापालिकेचे अतिक्रमण पथक व न्हाईचे पथकाकडून पोलिस बंदोबस्तात महामार्गावरील अतिक्रमण काढण्यात येणार आहे. त्यानुसार महामार्गावर लागणाऱ्या हातागाड्या व टपरीधारकांना अतिक्रमण काढून घेण्याबाबत सूचना देण्यात येत आहेत. यात आयटीआयजवळील हॉकर्सचा देखील समावेश आहे. विशेष म्हणजे सागर पार्कवरुन या हॉकर्सचे स्थलांतर महापालिकेनेच केले असल्याने पेच निर्माण झाला आहे. हॉकर्स संघटनेचे दिनेश हिंगणे यांच्यासह हॉकर्सने शु्रवारी अतिक्रमण निर्मूलन विभागाचे अधीक्षक एच. एम. खान यांची भेट घेवून गाऱ्हाणे मांडले. याबाबत महानगरपालिका आयुक्तांशी चर्चा करून निर्णय घेण्यात येणार असल्याचे त्यांनी सांग‌तिले.


फुले मार्केट पुन्हा मोकळे

जळगावातील फुले मार्केटमधील हॉकर्सबाबत तक्रारीनतंर अतिक्रमण पथकाने रविवार व सोमवारी कारवाई करून सर्व हॉकर्स हटविले होते. मनपा कर्मचारी निवडणुकीच्या ड्युटीवर गेल्याचा फायदा घेत मंगळवारनतंर पुन्हा मार्केटमधील अतिक्रमण जैसे थे झाले होते. शुक्रवारी पुन्हा महापालिका अतिक्रमण पथक फुले मार्केटमध्ये सकाळपासून तळ ठोकून बसल्याने हॉकर्सनी दुकाने लावली नाहीत.