आदिशक्तीचे जल्लोषात स्वागत

जळगावात मंगलमय वातावरणात घरोघरी घटस्थापना; बाजारात गर्दी

म. टा. प्रतिनिधी, जळगाव

‘सर्व मंगल मांगल्ये शिवे सर्वार्थ साधिके, शरण्ये त्र्यंबके गौरी नारायणी नमोस्तुते’मांगल्याचे, चैतन्याचे व उत्साहाचे प्रतीक असलेल्या नवरात्रोत्सवाला गुरुवार (दि. २१) पासून उत्साही व भक्तिमय वातावरणात सुरुवात झाली. सकाळपासूनच बाजारात भाविकांची घट व देवीच्या मूर्ती घेण्यासाठी गर्दी झाली होती. दुर्गोत्सव मंडळांनी ढोल-ताशांच्या गजरात आदिमायेचे स्वागत केले.

घट, देवीच्या मूर्ती, पुजेचे साहित्य खरेदीसाठी महिलावर्गाची गर्दी झाली होती. बांगड्या, चुनरी, हार, धान्यपुडी, दागिने, केळीचे खांबांना मागणी होती. देवी स्थापनेचा मुहूर्त सकाळी १० वाजेपासून होते. ज्यांनी बुधवारी पूजा साहित्याची खरेदी केली होती, त्यांनी गुरूवारी, सकाळीच घटस्थापना करून घेतली. प्रभात चौक, अजिंठा चौफुली, फुले मार्केट परिसरात देवीच्या मूर्ती खरेदीसाठी कार्यकर्त्यांची गर्दी दिसून आली. आजूबाजूच्या खेड्यांमधील तरुण मोठ्या संख्येने ट्रॅक्टर, ट्रक घेऊन मूर्ती घेण्यासाठी आले होते. शहरात बुधवारी, सायंकाळी मुसळधार पाऊस झाल्यानंतर गुरुवारीही पावसाचे वातावरण असल्याने मूर्ती ताडपत्रीने झाकून नेल्या जात होत्या.

खरेदीवर मंदीचे सावट

नवरात्रोत्सवाच्या पहिल्या माळेत म्हणजेच घटस्थापनेचा मुहूर्त साधत गुरुवारी वाहन बाजारासह इलेक्ट्रॉन‌‌िक वस्तूंची खरेदी करण्यात आली. यंदा घटस्थापनेच्या दिवशी तब्बल ५०० च्यावर वाहनांची खरेदी झाल्याचा अंदाज आहे. यंदा नोटाबंदी व जीएसटीमुळे वाहनांसह नवीन वस्तूंच्या खरेदीत घट झाली आहे. नवरात्रोत्सवाला मोठ्या प्रमाणात वाहनांची विक्री होत असते. नवरात्रोत्सव काळात गाड्यांची मागणी पाहता कंपन्याकडूनदेखील नवीन गाड्या बाजारात आणल्या जातात. यावर्षीदेखील नवीन गाड्या बाजारात आणण्यात आल्यात. मोटार सायकलींना मागणी अधिक होती.

इलेक्ट्रॉन‌िक बाजार जोमात

वाहन बाजारावर मंदीची झळ बसली असली तरी इलेक्ट्रॉन‌िक बाजाराचा आलेख उंचावला आहे. फ्रिज आणि एलईडी टीव्ही मागणी वाढली असून तब्बल ५० लाखांच्यावर बाजारात उलाढाल झाल्याची शक्यता विक्रेत्यांनी व्यक्त केली आहे. तसेच मोबाईल मार्केटमध्ये देखील मोठी उलाढाल झाली आहे. सध्या तरुणांमध्ये ऑनलाइन खरेदीची जास्त क्रेझ आहे. त्यातच नवरात्रोत्सवानिमित्त ऑनलाइन साइटसकडून अनेक वस्तूंवर ऑफर देण्यात आल्याने अनेकांनी मॉल किंवा शोरूम मध्ये न जाता ऑनलाइन खरेदी करून घेतली. यामध्ये मोबाइल आणि लॅपटॉपला जास्त मागणी होती.