नेरकर सोडणार शेंडीची गाठ!

म. टा. प्रतिनिधी, जळगाव

‘नंदकुळाचा नाश केल्याशिवाय शेंडीची गाठ सोडणार नाही’ अशी प्रतिज्ञा चाणक्याने केल्याचे आपण सर्वांनी इतिहासात वाचले आहे. याच धर्तीवर ‘ग. स.’ संस्थेच्या अध्यक्षपदी विराजमान झाल्याशिवाय शेंडीची गाठ सोडणार नाही, अशी प्रतिज्ञा विलास नेरकर यांनी केली होती. ही प्रतिज्ञा फळास आली असून, नेरकर आता शेंडीची गाठ सोडणार आहे. ‘ग.स.’ सोसायटीच्या अध्यक्षपदी नेरकर यांची बिनविरोध निवड करण्यात आली आहे. उपाध्यक्षपदी कैलासनाथ चव्हाण यांची निवड झाली.

सहकारी संस्थांमध्ये सर्वात मोठी व शतकपुर्ती केलेल्या जिल्हा सरकारी नोकरांची सहकारी पतपेढी अर्थात ग. स. सोसायटीच्या नूतन अध्यक्षपदी विलास नेरकर तर उपाध्यक्षपदी कैलासनाथ चव्हाण यांची बिनविरोध निवड करण्यात आली. विलास नेरकर यांना २००८ नंतर दुसऱ्यांदा अध्यक्षपदाची संधी मिळाली. पंचवार्षिक निवडणुकीनंतर पहिल्यांदा प्राथमिक शिक्षकाला अध्यक्षपदाचा मान मिळाला आहे.

ग. स. सोसायटीचे अध्यक्ष तुकाराम बोरोले व उपाध्यक्ष महेश पाटील यांनी दि. १९ नोव्हेंबर रोज़ी एक वर्षाचा कार्यकाळ संपल्याने राजीनामा राजीनामा दिला होता. शनिवारी दि. ९ रोजी ग. स. च्या सभागृहात नवीन अध्यक्ष व उपाध्यक्ष निवडीसाठी विशेष बैठकीचे आयोजन करण्यात आले होते.

सकाळी ११ वाजता सहकार गटाचे सर्व संचालक ग. स. सोसायटीत दाखल झाले. सोसायटीत सहकार गटाची एकहाती सत्ता असल्याने श्रेष्ठींच्या आदेशावरुन विलास नेरकर यांनी अध्यक्षपदासाठी, तर कैलासनाथ चव्हाण यांनी उपाध्यक्षपदासाठी अर्ज दाखल केला. यावेळी दोन्ही पदांसाठी एकच अर्ज असल्याने अध्यक्षपदी विलास यादवराव नेरकर यांची तर उपाध्यक्षपदी कैलासनाथ पंढरीनाथ चव्हाण यांची बिनविरोध निवड जाहीर करण्यात आली. सहाय्यक उपनिबंधक डी. ए. शेळके यांनी निवड प्रकियेवेळी कामकाज पाहिले. यावेळी सहकार गटातील श्रेष्ठी उपस्थित होते.

वरिष्ठांच्या बैठकीत निर्णय

ग. स. सोसायटीच्या अध्यक्षपदासाठी उदय पाटील, सुनील पाटील व विलास नेरकर यांची नावे चर्चेत होती. मात्र शनिवारी सकाळी अध्यक्ष-उपाध्यक्ष निवडीपूर्वी सहकार गटाचे नेते बी. बी. पाटील यांच्या निवासस्थानी गटातील २० संचालकांच्या मुलाखती घेऊन मत विचारण्यात आले. श्रेष्ठींच्या निर्णयानुसार विलास नेरकर यांना अध्यक्षपदाची तर कैलास चव्हाण यांना उपाध्यक्षपदाची संधी देण्याचे ठरविण्यात आले. त्यांनतर सकाळी ११ वाजता सर्व संचालक ग. स. सोसायटीत दाखल झाल्यानंतर नेरकर यांनी अध्यक्षपदाचा तर चव्हाण यांनी उपाध्यक्षपदाचा अर्ज सहाय्यक उपनिबंधक यांच्याकडे दाखल केला. दोन्ही पदांसाठी एकच अर्ज असल्याने दोघांची बिनविरोध निवड करण्यात आली.

जळगाव जिल्हा सरकारी नोकरांच्या सहकारी पतपेढीमध्ये प्राथमिक शिक्षकाला अध्यक्षपदाची संधी देण्याचा निर्णय सहकार गटाच्या श्रेष्ठींनी सर्वानुमते घेतला असल्याचे सहकार गटाचे अध्यक्ष बी. बी. पाटील यांनी सांगितले.

निवडीप्रसंगी सहकार गटाचे अध्यक्ष बी. बी. पाटील, गटनेते उदय पाटील, मावळते अध्यक्ष तुकाराम बोरोले, महेश पाटील, मनोज पाटील, अजबसिंग पाटील, ज्ञानेश्वर सोनवणे, अनिल कौतिक गायकवाड-पाटील, रागिणी चव्हाण, देवेंद्र पाटील, भाईदास पाटील, सुनील पाटील, शामकाम भदाणे, विश्वास सूर्यवंशी, विक्रमादित्य पाटील, यशवंत सपकाळे, विद्यादेवी पाटील, सुभाष जाधव, मंगेश भोईटे, राजेंद्र माळी, नाना पाटील यांच्यासह सभासद उपस्थित होते.

नेरकर यांची प्रतिज्ञा

ग. स. सोसायटीच्या यंदाच्या पंचवार्षिक निवडणुकीत संचालक म्हणून निवडून आल्यानंतर विलास नेरकर यांनी ‘जोपर्यंत मी अध्यक्ष होत नाही, तोपर्यंत शेंडीची गाठ बांधेल आणि अध्यक्ष झाल्यानंतरच गाठ सोडेल’ असा संकल्प केला होता. आता अध्यक्ष म्हणून बिनविरोध निवड झाल्यानंतर नेरकर यांनी शेंडीची गाठ सोडणार असल्याचे सांगितले.

सभासदांसाठी दवाखाना

सभासदांसह पाल्यांना आरोग्याच्या सुविधा मिळाव्यात, यासाठी माफक दरात दवाखाना सुरू करण्याचा मानस असल्याचे नवनिर्वाचित अध्यक्ष विलास नेरकर यांनी सांगितले. तसेच ग. स. सभासदांच्या कर्जावरील व्याजदर व लाभांश याबाबत श्रेष्ठी व संचालकांशी चर्चा करून सभासद हिताचा निर्णय घेऊ, असेही ते म्हणाले.