वाहतुकीसाठी नवीन आराखडा

म. टा. प्रतिनिधी, जळगाव

शहरातील वाढती वाहनसंख्या बघता शहरातील मुख्य रस्ते, चौकांमध्ये पार्किंग झोन, एकेरी मार्ग अश्या प्रकार पोलिस अधीक्षकांनी नुकताच वाहतुकीचा आराखडा तयार केला आहे. तशी अधिसूचना जारी करण्यात आली असून त्यानुसार ठिकठिकाणी मार्गदर्शक सूचनांचे फलक लावण्यासाठी अधिसूचना महापालिकेकडे पाठविण्यात
आली आहे.

नेहरू चौक, रेल्वे स्टेशन चौक, शास्त्री टॉवर चौक, सानेगुरूजी चौक, घाणेकर चौक, सुभाष चौक या परिसरात मुख्य बाजारपेठ असून, खरेदीकरीता नागरिक मोठ्या प्रमाणावर येत असतात. हे नागरिक पार्किंगसाठी जागा नसल्याने आपली वाहने दुकानांसमोर, रस्त्यात उभी करीत असल्याने वाहतुकीची मोठ्या प्रमाणावर कोंडी होत असते. यासाठी शहरातील महाविद्यालयीन, शालेय विद्यार्थी व सर्व नागरिक व वाहनधारकांच्या सुरक्षिततेच्या दृष्टीने याठिकाणी पोलिस अधीक्षक दत्तात्रय कराळे यांनी नो-पार्किंग, सम-विषम दिवस पार्किंग, पार्किंग झोन व एकेरी मार्ग प्रसिद्ध केला आहे.

दोन्ही बाजूला पार्किंग झोन

यात नेहरू चौक ते टॉवर चौकपर्यंतच्या रस्त्याच्या दोन्ही बाजूस पार्किंग पट्ट्यांमध्ये दुचाकी व चारचाकी वाहनांकरीता पार्किंग झोन प्रसिद्ध करण्यात आला आहे. जिल्हा परिषद चौक ते टॉवर चौकपर्यंतच्या रस्त्याच्या दोन्ही बाजूस पार्किंग पट्ट्यांमध्ये दुचाकी व चारचाकी वाहनांकरीता पार्किंग झोन असणार आहे. प्रभात चौक ते मु. जे. कॉलेजचे मुख्य प्रवेशद्वारपर्यंतच्या रस्त्यांवर डाव्या बाजूला पार्किंग पट्ट्यांमध्ये विषम तारखेला पार्किंग झोन असणार आहे. कॉलेजच्या मुख्य प्रवेशद्वार ते प्रभात चौकापर्यंतच्या रस्त्याच्या डाव्या बाजुला पार्किंग पट्ट्यांमध्ये सम तारखेला दुचाकी व चारचाकी वाहनांकरीता पार्किंग व्यवस्था करण्यात आली आहे.

नो-पार्किंग झोन

टॉवर चौक ते सानेगुरूजी चौक ते घाणेकर चौक पर्यंतच्या रस्त्यांवर दोन्ही बाजूस सर्व प्रकारच्या वाहनांकरीता नो-पार्किंग झोन राहणार आहे. तसेच टॉवर चौक ते घाणेकर चौक पर्यंतच्या येण्याजाण्याचा मार्ग तीनचाकी व चारचाकी वाहनांकरीता नो-पार्किंग झोन असणार आहे. पर्यायी पार्किंग झोन म्हणून शहर पोलिस स्टेशन शेजारील जुन्या नगरपालिकेचा खुला भूखंड व महात्मा गांधी मार्केटशेजारील सानेगुरूजी रुग्णालयाचा खुला भूखंड हा दुचाकी व चारचाकी वाहनांकरीता पार्किंग झोनसाठी वापरता येणार आहे. दाणा बाजारातील खैरनार ऑप्टिकल ते सुभाष चौकापर्यंत रस्ता एकेरी मार्ग करण्यात आला आहे. हा मार्ग सर्व प्रकारच्या वाहनांकरीता प्रवेश बंद करण्यात आला असून, पर्यायी मार्ग म्हणून सुभाष चौक, राजकमल चौक मार्गे चित्रा चौक हा मार्ग असणार आहे. दाणा बाजारात येणार्‍या वाहनांकरीता नेरी नाका परिसरातील स्मशानभूमी समोरील खुल्या भूखंडांमध्ये ट्रक व इतर वाहन पार्किंगकरीता वाहनस्थळ तयार करण्यात येणार आहे.