निर्माल्य संकलन मोहिमेतील स्वयंसेवकांचा सन्मान

शहरातील १५७ टन निर्माल्य एकत्र

म. टा. प्रतिनिधी, जळगाव

जिल्हाधिकारी व जिल्हादंडाधिकारी कार्यालय, जळगाव आयोजित ‘जळगाव शहर निर्माल्य संकलन मोहीम २०१७’ अंतर्गत जळगाव शहरात गणेश उत्सवातील निर्माल्याची योग्य पद्धतीने विल्हेवाट लावण्यासाठी दि. ४ सप्टेंबर ते ७ सप्टेंबर २०१७ या कालावधीत राबविलेल्या मोहिमेत सहभाग घेतलेल्या स्वयंसेवकांचा व विद्यार्थ्यांचा मंगळवारी (दि. २४) जिल्हाधिकारी किशोर राजेनिंबाळकर यांच्या हस्ते प्रमाणपत्र देऊन सन्मान करण्यात आला.

शहरातील प्रत्येक प्रभागातून निर्माल्य संकलन कार्य मोहिमेची संकल्पना कृतीत उतरवताना यासंदर्भातील आवाहनातून लोकसहभागातून नागरिक, शाळा कॉलेजेस तसेच सेवाभावी संस्थांनी दिलेल्या योगदानातून हा उपक्रम राबविण्यात आला होता. स्वयंसेवकांच्या सन्मानाप्रसंगी माजी महापौर नितीन लढ्ढा, विनय पारख, सुनील मंत्री, संजय तापडिया, वन्यजीव संरक्षण संस्थेचे सचिव राहुल सोनवणे, प्रा. योगेश महाले, प्रवीण पाटील, वर्धिष्णू संस्थेच्या समन्वयिका अनिता साळवे, बाहेती कॉलेजचे राहुल बनसोड, डॉ शामा सुबोद सराफ यांच्यासह राष्ट्रीय उपक्रमात योगदान देणारे सन्मानार्थी आदी मान्यवर जिल्हाधिकारी कार्यालयाच्या सभागृहात उपस्थित होते

१५७ टन निर्माल्यांचे संकलन
या मोहिमेअंतर्गत जळगाव शहरातून निर्माल्य संकलन करून त्याची विगतवारी करण्यात आली. यामध्ये सुमारे १५७ टन निर्माल्य हे जळगाव शहरातील संपूर्ण गल्लोगल्ली १८ निर्माल्य रथ फिरून तसेच शहरात ३२ ठिकाणी याचे स्टॉल लावण्यात आले होते. या संकलन मोहिमेत जी. एच. रायसोनी महाविद्यालय, मु. जे. महाविद्यायल, आयएमआर कॉलेज, बाहेती कॉलेज कॉलेज, मोरया ग्रुप, महाराष्ट्र राज्य हरित सेवा, पर्यावरण शाळा, एल. के. फाउंडेशन, मराठी प्रतिष्ठान, जळगाव फर्स्ट, जळगाव मनपा, वन्यजीव संरक्षण संस्था, आशा फाउंडेशन, रोटरी क्लब आदींच्या सहभागातून एकूण २५०० हून अधिक विद्यार्थ्यांनी सहभाग नोंदविला. प्रास्ताविक निर्माल्य समितीचे सन्मवयक सुशील शामसुंदर नवाल यांनी केले.