‘स्वप्नांसाठी दृष्टी नव्हे दृष्टिकोनाची गरज’

म. टा. प्रतिनिधी, जळगाव

स्वप्न पाहण्यासाठी दृष्टी नाही तर दृष्टिकोनाची गरज असते, असे मत युपीएससी परीक्षेतून आयआरएसपदी निवड झालेल्या प्रज्ञाचक्षू अल्पना दुबे यांनी व्यक्त केले. दीपस्तंभ फाउंडेशन आयोजित स्पर्धा परीक्षा यशवंतांच्या सत्काराच्या यशोत्सव कार्यक्रमात त्या बोलत होत्या.

या प्रसंगी मंचावर नवी मुंबई मनपा आयुक्त डॉ. एन. रामास्वामी, जिल्हाधिकारी किशोरराजे निंबाळकर, पोलिस अधीक्षक दत्तात्रय कराळे, अप्पर पोलिस अधीक्षक बच्चनसिंग, रतनलाल बाफना, डॉ. किरण देसले उपस्थित होते.

अल्पना दुबे म्हणाल्या की, मी मनोबल परिवाराचे आभार मानते, विश्वास, आशीर्वाद आणि स्वप्न हे माझ्या जीवनाचे आधारस्तंभ आहेत. नियोजन, अंमलबजावणी आणि नियमित गुणवत्तेचे प्रयत्न या बाबी यशाला गवसणी घालतात. माझी आई माझी प्रेरणास्रोत आहेत तर वडील माझे दीपस्तंभ आहेत. माझे भाऊ माझे डोळे आहेत असेही त्यांनी सांगितले.

नवी मुंबईचे आयुक्त डॉ. एन रामास्वामी यांनी, प्रत्येक व्यक्ती स्वतः एक प्रेरणास्रोत असते. आत्मजागृत व्हा, असे आवाहन त्यांनी केले. जिल्हाधिकारी किशोर राजे निंबाळकर म्हणाले की, आपण समाजाचे काही देणे लागतो, या भावनेने जर अधिकाऱ्यांनी काम केले तर समाज सुखी होईल. सोलापूर येथील दोन्ही हात नसणाऱ्या, व पायाने पेपर लिहून परीक्षा देणाऱ्या लक्ष्मी शिंदे हिला बारावीत ६८ टक्के मिळाले, तिचे पदवीसह स्पर्धा परीक्षा शिक्षणासाठी दीपस्तंभ मनोबल प्रकल्पात दत्तक घेण्यात आले. या प्रसंगी मनोगत व्यक्त करताना यूपीएससी उत्तीर्ण सचिन पाटील, मनोज पाटील, रतनलाल सी. बाफना, अप्पर पोलिस अधीक्षक बच्चन सिंग, डॉ. धीरज मोरे, उपजिल्हाधिकारी नीलम बाफना, महादेव पाटील, नंदा शेळके यांनी मनोगत व्यक्त केले. प्रास्ताविक यजुर्वेन्द्र महाजन तर सूत्रसंचालन राजेंद्र चव्हाण यांनी केले.