सोलापूर विद्यापीठाबरोबर ​ उमविचा सामंजस्य करार

म. टा. प्रतिनिधी, जळगाव

उत्तर महाराष्ट्र विद्यापीठ, जळगाव आणि सोलापूर विद्यापीठ, सोलापूर यांच्यात नुकताच सामंजस्य करार करण्यात आला असून, कुलगुरू प्रा. पी. पी. पाटील आणि कुलगुरू प्रा. एन. एन. मालदार यांच्या उपस्थितीत करारावर स्वाक्षऱ्या करण्यात आल्या.

भौतिकशास्त्र विषयात अधिक गुणवत्तापूर्ण संशोधन व्हावे यादृष्टीने हा करार महत्त्वाचा ठरणार आहे. या करारान्वये पॉलिमर, कंडक्टींग पॉलिमर नॅनो कंपोझाइडस्, नॅनो स्ट्रक्चर मेटल ऑक्साइडस्, नॅनो मटेरियल, सेन्सर्स, फोटोव्होल्टाइक, व्ही.एल.एस.आय.टेक्नॉलॉजी, वायरलेस सेन्सिंग नेटवर्क आदी विषयांबाबत संशोधन, संशोधनाचे आदानप्रदान होणार आहे. तसेच विद्यार्थ्यांना आवश्यक तेथे प्रशिक्षण, विद्यार्थी आणि शिक्षक यांचेही आदानप्रदान होऊन विश्लेषणात्मक सेवा आणि तंत्रज्ञान हस्तांतरण आदी कार्यक्रम राबविले जाणार आहेत.

संशोधनाला प्रोत्साहन

संशोधनासाठी दोन्ही विद्यापीठाच्या प्रयोगशाळा उपलब्ध करून दिल्या जातील. काही संयुक्त संशोधन प्रकल्प हाती घेतले जाणार असून, त्याद्वारे संशोधनाला प्रोत्साहन देण्यात येणार आहे. कुलगुरू प्रा. पी. पी. पाटील आणि कुलगुरू प्रा. एन. एन. मालदार यांच्यात या विषयावर अधिक चर्चा होऊन काही नवे प्रकल्प राबविण्याबाबतही सहमती दर्शविण्यात आली.