‘उ‌मवि’च्या कुलगुरूपदी डॉ. पी. पी. पाटील

बुधवारी स्वीकारणार पदाचा कार्यभार

म. टा. वृत्तसेवा, जळगाव

उत्तर महाराष्ट्र विद्यापीठाचे सहावे कुलगुरू म्हणून प्रा. डॉ. पी. पी. पाटील यांची निवड करण्यात आली असून राज्यपालांनी मंगळवार, (दि. २५) रोजी त्यांची ही निवड जाहीर केली. प्रा. पाटील हे विद्यापीठाच्या भौतिकशास्त्र प्रशाळेत प्रोफेसर म्हणून कार्यरत आहेत. बुधवारी (दि. २६) ऑक्टोबर रोजी सकाळी ११ वाजता प्रा. पाटील हे कुलगुरूपदाचा पदभार स्वीकारणार आहेत.

उत्तर महाराष्ट्र विद्यापीठाच्या कुलगुरू पदाकरिता मागील आठवड्यात २० ऑक्टोबर रोजी राज्यपाल सी. विद्यासागर राव यांनी कुलगुरूपदाच्या उमेदवारांच्या मुलाखती घेतल्या. त्यामध्ये प्रा. पी. पी. पाटील, प्रा. आर. डी. कुलकर्णी, प्रा. डी. जी. हुंडीवाले, प्रा. ए. एम. महाजन यांचा समावेश होता. राज्यपालांनी ऑगस्ट महिन्यात पाटणा उच्च न्यायालयाचे निवृत्त मुख्य न्यायाधीश एल. नरसिम्हा रेड्डी यांच्या अध्यक्षतेखाली शोध समिती गठित केली होती.

डॉ. प्रदीप पाटील यांनी भौतिकशास्त्र या विषयात सावित्रीबाई फुले पुणे विद्यापीठ येथून प्राविण्यासह एम. एस्सी. ही पदवी संपादन केली असून पुढे त्याच विषयात पीएच. डी. देखील प्राप्त केली आहे. डॉ. पाटील यांना शिक्षण, संशोधन व प्रशासन या क्षेत्रात व्यापक अनुभव आहे.