‘उमवि’ नामविस्तार सोहळा ऑगस्टमध्ये

कार्यक्रमास मुख्यमंत्र्यांची उपस्थिती

म. टा. प्रतिनिधी, जळगाव

उत्तर महाराष्ट्र विद्यापीठाला कवयित्री बहिणाबाई चौधरी यांचे नाव देण्याबाबतच्या विधेयकाला विधानसभेत नुकतीच एकमताने मंजुरी देण्यात आली. यासाठीचा नामविस्तार सोहळा येत्या ११ ऑगस्टमध्ये होणार असल्याची माहितीही यावेळी देण्यात आली.

‘उमवि’च्या नामातंराचे विधेयक उच्च व तंत्र शिक्षणमंत्री विनोद तावडे यांनी सभागृहात मांडले. त्यावेळी बोलताना तावडे म्हणाले की, कवयित्री बहिणाबाई चौधरी यांना त्यांच्या कवितेमधून जो माणूस अपेक्षित होता. तो या विद्यापीठाच्या माध्यमातून निर्माण करण्यासाठी प्रयत्न केला जाईल. बहिणाबाईंच्या जयंतीदिनी म्हणजेच दि. ११ ऑगस्टला विद्यापीठाचा नामविस्तार कार्यक्रम मुख्यमंत्र्यांच्या उपस्थितीत केला जाईल. या विद्यापीठात बहिणाबाई चौधरींच्या नावे अध्यासन सुरू करण्याबाबत विचार केला जाईल, असेही तावडे यांनी या वेळी सांगितले. कवयित्री बहिणाबाई चौधरी विद्यापीठामध्ये बोली भाषा वर्ग सुरू करण्याबाबत लवकरच निर्णय घेण्याचे आश्वासन शिक्षणमंत्री विनोद तावडे यांनी या वेळी दिले.