सिनेट निवडणुकीत उमविची आघाडी

जळगाव ः नवीन विद्यापीठ कायदा लागू झाल्यापासून सात महिन्यांच्या आत विद्यापीठ प्राधिकरणाच्या निवडणूका (पदवीधर गट वगळून) पूर्ण करणारे उत्तर महाराष्ट्र विद्यापीठ हे महाराष्ट्रातील पहिले विद्यापीठ ठरले आहे. १ मार्च, २०१७ पासून महाराष्ट्र सार्वजनिक विद्यापीठे अधिनियम २०१६ अंमलात आला त्या अनुषंगाने विविध प्राधिकरणांचे गठन करण्याची प्रक्रिया उत्तर महाराष्ट्र विद्यापीठाने तातडीने सुरू केली.

कुलगुरू प्रा. पी. पी. पाटील यांनी दिलेल्या निर्देशानुसार १० मार्च २०१७ पासून विद्यापीठात निवडणूक शाखा नियमित सुरू करण्यात आली. कुलगुरूंच्या मार्गदर्शनाखाली प्रभारी कुलसचिव प्रा. ए. बी. चौधरी हे निवडणूक निर्णय अधिकारी व उपकुलसचिव बी. बी. पाटील हे निवडणूक विभागप्रमुख म्हणून काम पाहू लागले. निवडणूक उमेदवारी अर्ज भरण्याच्या कालावधीत प्राचार्यांमधून अधिसभेवर दहा जागा बिनविरोध निवडून आल्या.