रमाकांत, चारू नृत्यभूषण तर प्रचिती, रोहिणी 'नृत्यश्री

म. टा. प्रतिनिधी, जळगाव

कटक येथील आंतरराष्ट्रीय नृत्य व नाट्य महोत्सवात भुसावळ येथील रमाकांत व चारू भालेराव यांना इराण येथील कलावंतांच्या हस्ते स्मृतिचिन्ह, प्रमाणपत्र व शाल देऊन राष्ट्रीय नृत्यभूषण पुरस्काराने सन्मानित करण्यात आले. तर प्रचिती कुलकर्णी आणि रोहिणी महाजन यांना राष्ट्रीय नृत्यश्री पुरस्कार प्रदान करून गौरविण्यात आले.

ओडिशा राज्यातील कटक येथे उत्कल युवा सांस्कृतिक संघ, कटक जिल्हा प्रशासन आणि ओडिशा राज्य सांस्कृतिक व पर्यटन विभाग यांच्या संयुक्तरित्या आयोजित २५ व्या आंतरराष्ट्रीय नृत्य व नाट्य महोत्सव पार पडला. या महोत्सवात देशातील काही कलावंतांसह अफगाणिस्तान, अर्जेंटिना, ऑस्ट्रेलिया, बांगलादेश, इराण, इटली, जपान, स्पेन, मेक्सिको या देशांतील कलाकारांनी कला सादर केली. भुसावळ येथील राष्ट्रीय नाट्यसंघाचे कलाकार रमाकांत भालेराव व चारू भालेराव यांनी युगल नृत्यातून कथक नृत्य प्रकारातील अर्धनारी नटेश्वर स्तुती तर प्रचिती कुलकर्णी हिने शास्रीय नृत्य प्रकारात श्री दत्त स्तुती सादर केली. रोहिणी महाजन हिने लोकनृत्य प्रस्तुत केले.