कॅरिऑनसाठी उमवित आंदोलन

म. टा. प्रतिनिधी, जळगाव

विशेषाधिकाराचा वापर करून कुलगुरूंनी उमवि संलग्नित अभियांत्रिकी महाविद्यालयांमध्ये शिकणाऱ्या जुन्या व नव्या अभ्यासक्रमातील विद्यार्थ्यांना २०१७-१८ या शैक्षणिक वर्षाकारिता कॅरिऑन द्यावे. या मागणीसाठी राष्ट्रीय विद्यार्थी काँग्रेसतर्फे (एनएसयूआय) बुधवारी उमविच्या मुख्य इमारतीसमोर निदर्शने आंदोलन करण्यात आले.

अभियांत्रिकीचे बहुतेक विद्यार्थी हे तिसऱ्या वर्षाचे विषय उत्तीर्ण झाले आहेत. मात्र दुसऱ्या वर्षाच्या एका विषयात नापास झाल्याने त्यांना चौथ्या वर्षाला प्रवेश घेता येत नाही. यामुळे त्यांचे शैक्षणिक नुकसान होत असल्याने एनएसयूआयकडून जिल्हाध्यक्ष देवेंद्र मराठे यांच्या नेतृत्वाखाली आंदोलन करण्यात आले. बुधवारी दुपारी १२ वाजता शेकडो विद्यार्थ्यांनी उमवि परिसर ‘वुई वॉन्ट करिऑन’ च्या घोषणांनी दणाणून सोडला होता. एनएसयुआयच्या काही विद्यार्थ्यांनी प्रभारी कुलसचिव प्रा. ए. बी. चौधरी यांची भेट घेतली. नांदेड विद्यापीठाचे कुलगुरूंनी आपल्या विशेषाधिकार वापरून विद्यापीठातील संलग्नित अभियांत्रिकी महाविद्यालयांमध्ये कॅरीऑन सुरू केले आहे. मग उमवि प्रशासनाला काय अडचण आहे, असा प्रश्न विद्यार्थ्यांनी उपस्थित केला. विद्यार्थ्यांना चांगली वागणूक दिली नसल्याचाही आरोप विद्यार्थ्यांनी केला.