‘शंभर टक्के वसुलीवर अधिकाऱ्यांनी भर द्यावा’

म. टा. प्रतिनिधी, जळगाव

महसूल अधिकाऱ्यांनी आपल्या कार्यक्षेत्रातील शासकीय येणी १०० टक्के वसूल होण्यावर भर द्यावा, असे निर्देश नाशिक विभागाचे विभागीय आयुक्त महेश झगडे यांनी दिल्या.

जिल्ह्यातील महसूल अधिकाऱ्यांची बैठक बुधवारी (दि. २०) येथील जिल्हाधिकारी कार्यालयातील नियोजन सभागृहात आयुक्त महेश झगडे यांच्या अध्यक्षतेखाली आयोजित करण्यात आली होती. या बैठकीत झगडे यांनी सरकारच्या विविध योजनांतर्गत जिल्ह्यात सुरु असलेल्या कामांचा आढावा घेताना त्यांनी वरीलप्रमाणे निर्देश दिले. बैठकीस जिल्हाधिकारी किशोर राजे निंबाळकर, दिलीप स्वामी, वनविभागाचे उप वनसंरक्षक आदर्श कुमार रेड्डी, अप्पर जिल्हाधिकारी गोरक्ष गाडीलकर, उपायुक्त दिलीप स्वामी, उन्मेष महाजन, निवासी उपजिल्हाधिकारी राहुल मुंडके आदी उपस्थित होते. शासकीय वसुली होत नसल्यास संबंधितांना नोटीस द्याव्या. याबाबत बैठका घेऊन शासकीय वसुली पूर्ण करावी. सर्व उपविभागीय अधिकारी, तहसीलदार यांनी तलाठ्यांच्या दप्तराची तपासणी करावे. त्यात दोष आढळून आल्यास संबंधितांवर कठोर कारवाई करावी,ख्‍ असेही आयुक्तांनी सांगितले. रि-एडिट आज्ञावलीच्या कामात प्रत्येक तालुक्याने ३१ डिसेंबरपर्यंत राज्याच्या सरासरीपेक्षा जास्त काम करावे. या कामात तलाठ्यांना येणाऱ्या अडचणी सोडविण्यासाठी तहसीलदारांनी मदत करावी. जलयुक्त शिवार अभियानातंर्गत करावयाच्या कामाचे आराखडे तपासूनच पाठवावेत. त्यात कोणत्याही त्रुटी राहणार नाहीत याची दक्षता सर्व संबंधितांनी घ्यावी. अकृषक शेतीची प्रकरणे तपासताना व त्यास मंजूरी देताना शेतकऱ्यांना मिळणाऱ्या लाभासंबंधीचीही माहिती देण्याच्या सूचनाही त्यांनी यावेळी दिल्या.