जळगावात तरुणाची गळफास घेऊन आत्महत्या

म. टा. प्रतिनिधी, जळगाव

पारख नगर भागात राहणाऱ्या ३५ वर्षीय तुषार लक्ष्मीकांत ढाके याने रविवारी (दि. १५) सकाळी गळफास घेऊन आत्महत्या केल्याची घटना उघडकीस आली. तुषार ढाके हे गेल्या अकरा वर्षांपासून जैन इरिगेशन कंपनीत टेक्निशियन पदावर नोकरीस आहेत.

पारख नगर परिसरात ते भाड्याच्या खोलीत पत्नी धनश्री, मुलगी हास्या (वय ७) व मुलगा तनव (वय ५) यांच्यासोबत राहत होते. ढाके कुटुंबीय मुळचे ममुराबाद येथील आहे. तुषार ढाके यांच्या आई ममुराबाद येथेच राहतात. रविवारी दुपारी ४ वाजता त्यांची ड्यूटी होती. तत्पूर्वी सकाळी ८.३० वाजता त्यांच्या पत्नी कामानिमित्त मुलांसोबत घराबाहेर गेल्या होत्या. त्यानंतर धनश्री या ९ वाजेला घरी पोहचल्या त्यावेळी ढाके यांच्या खोलीचा दरवाजा आतून बंद होता. बराच वेळ दरवाजा ठोठावल्यानंतरदेखील कोणताही होकार आला नाही. यावेळी धनश्री यांनी खिडकीतून डोकावल्यानंतर ढाके यांनी गळफास घेतल्याचे त्यांना दिसून आले. हे दृष्य पाहून त्यांना धक्का बसला.

त्यांनी लागलीच शेजारच्यांना याची माहिती दिली. परिसरातील नागरिकांनी पोलिसांच्या मदतीने दरवाजा तोडून आत प्रवेश केला. त्यांनतर ढाके यांना जिल्हा सामान्य रुग्णालयात दाखल केले मात्र, तपासणी करून डॉक्टरांनी त्यांना मृत घोषित केले. रामानंद नगर पोलिस ठाण्याचे कर्मचारी अरूण पाटील यांनी घटनास्थळाचा पंचनामा केला. ढाके यांनी आत्महत्या का केली याचे कारण अद्याप समोर आलेले नाही.

मित्रांना दिवाळीच्या शुभेच्छा दिल्या

ढाके हे कंपनीत चांगल्या पदावर नोकरीस होते. रविवारी सकाळी ७.३० वाजता काही मित्रांना फोन करून त्यांनी अनौपचारिक गप्पादेखील मारल्या तसेच दिवाळीच्या शुभेच्छाही दिल्या होत्या. दुपारी ४ वाजता ड्यूटीवर जाण्याच्या संदर्भात बोलणे झाले होते. त्यानंतर दीड तासातच त्यांनी आत्महत्या केल्याची माहिती समोर आली. यामुळे मित्रांनादेखील धक्का बसला. जिल्हा रुग्णालयात त्यांच्या सहकारी मित्रांनी गर्दी केली होती. लाडका मित्र गेल्यामुळे त्यांना दु:ख अनावर झाले होते.