जळगावमध्ये कांदा सहा रुपये किलो

म. टा. वृत्तसेवा, जळगाव

कांद्याची आवक यंदा मोठ्या प्रमाणात होत असून, जळगावात कृषी उत्पन्न बाजार समितीत दर दिवसाला दीडशे ते दोनशे क्विंटल कांद्याची आवक होत आहे. त्यामुळे कांद्याच्या दरात लक्षणीय घट झाली आहे. सद्यस्थितीत किरकोळ बाजारात कांदा हा सहा रुपये किलो, तर घाऊक बाजारात अवघा चार रुपये किलो दराने मिळत आहे. त्यामुळे ग्राहकांचा फायदा होत असला तरी, शेतकरीवर्गावर मात्र कांदा फेकून द्यायची वेळ आली आहे.

गेल्या वर्षी कांदा लागवडीत घट असल्यामुळे त्याच्या दराने शंभरी गाठली होती. परंतु यंदा जिल्ह्यात कांदा लागवड मोठ्या प्रमाणात झाल्यामुळे त्याची आवक वाढली आहे. उत्पादक शेतक-यांना चार ते सहा रुपये किलो दराने कांदा विकावा लागत आहे. तसेच अतिवृष्टीमुळे कांदा सडण्याचे प्रमाण वाढले आहे. त्यामुळे शेतकरी मिळेल त्या दरात कांदाविक्री करीत आहे. आवक जास्त असल्याने कांद्याचे दर कोसळले असल्याची माहिती बाजार समितीचे सचिव सोपान पाटील यांनी मटाशी बोलताना दिली. दरम्यान, अनेकांनी कांदा साठवून ठेवला होता. बाजारात नवीन कांदा येत असतानाच साठेबाजांनी साठवून ठेवलेला कांदा विक्रीसाठी बाजारात आणल्यामुळे ही स्थिती निर्माण झाली असल्याचे बोलले जात आहे.


जळगाव कृषी उत्पन्न बाजार समितीत चाळीसगाव, एरंडोल, धरणगाव यासह जिल्ह्याबाहेरील कन्नड येथूनही मोठ्या प्रमाणात कांद्याची आवक होत आहे. सोमवारी दोनशे क्विंटल कांद्याची आवक बाजार समितीत झाली. ही परिस्थितीत कायम राहिल्यास दरात अजून घसरण होण्याची भीती आहे.

- गोविंद नारखेडे, सहायक सचिव, कृउबा