गाळेधारकांचे थकीत भाडे वसूल करण्याचे आदेश

म. टा. प्रतिनिधी, जळगाव
मनपाच्या मुदत संपलेल्या मार्केटमधील गाळेधारकांकडे असलेल्या थकीत भाडेवसुलीबाबत समाजिक कार्यकर्ते दीपककुमार गुप्ता यांच्या तक्रारीची दखल घेत सरकारने नियमानुसार कारवाई करण्याचे आदेश मनपाला दिले आहेत. याबाबतचे पत्र मंगळवारी मनपा प्रशासनाला प्राप्त झाले आहे. महापालिका मालकीच्या मुदत संपलेल्या मार्केटमधील गाळेधारकांकडे असलेल्या थकीत भाड्यापोटीची रक्कम वसूल करण्याबाबत दीपककुमार गुप्ता यांनी गेल्या पाच महिन्यांत सहा वेगवेगळ्या तक्रारी केल्या होत्या. या तक्रारीची दखल सरकारने हे आदेश काढले आहेत. यामध्ये गाळेधारकांकडून थकीत भाडे वसुलीसह मनपास आर्थिक नुकसानीतून वाचविण्यासाठी आयुक्तांच्या चौकशी करणे व गाळेधारकांविरुद्ध जिल्हा न्यायालयात दाखल केलेल्या अपिल अर्जात मनपाची बाजू योग्यरित्या न मांडल्यामुळे मनपाच्या झालेल्या आर्थिक नुकसानीबाबतदेखील कार्यवाही करण्याचे आदेश सरकारकडून देण्यात आले आहे.