पाचोऱ्यातील युवकाने व्यापाऱ्यास गंडवले

चाळीसगाव : येथील युवकाने जम्मू काश्मिरच्या सफरचंद विक्रीचा करणाऱ्या व्यापाऱ्यास ४० लाखात गंडवले. उधारीचे पैसे देण्यास टाळाटाळ केल्याने या युवकास जम्मू काश्मिरच्या पोलिसांनी ताब्यात घेतले. या युवकाविरुद्ध जम्मूतील न्यायालयाने वॉरंट बजावले होते.

पाचोरा येथील कृष्णापुरी भागातील रहिवासी संदीप काशिनाथ साळुंखे या युवकाने गेल्या दोन वर्षांपूर्वी पुलगामा (जम्मू-काश्मिर) येथील नजीर अहमद व मुख्तार अहमद या व्यापाऱ्यांकडून ४० लाख रुपयांचे सफरचंद दोन ते तीन टप्प्यात उधारीने घेतले. यासाठी त्याने आपण महाराष्ट्रातील डिलर असल्याचे त्याने भासविले. यानंतर तरुणाने सफरचंद ट्रान्सपोर्ट कंपनीने आणून या दोन व्यापाऱ्यांना एक दमडीही दिली नाही.

या पैशांसाठी जम्मूहून वर्षभरापूर्वी हे व्यापारी दोनदा पाचोरा येथे येऊन गेले होते. मात्र संदीप साळुंखे याने त्यांना त्यावेळीही मालाचे पैसे दिले नाही. मी स्वत: आपल्याकडे येऊन पैसै देईल, अशी बनवाबनवी त्याने व्यापाऱ्यांना करीत माघारी पाठविले. आपल्या मालाचे पैसे वर्षभरापासून मिळत नसल्याने या व्यापाऱ्यांनी अखेर जम्मू काश्मिरातील पुलगामा न्यायालयात धाव घेतली. न्यायालयाने या युवकास न्यायालयात हजर राहण्याचे आदेशही दिले. परंतु, तेथेही तो हजर न झाल्याने त्याच्या अटकेचे आदेश न्यायालयाने दिले. यावरून पुलगामा येथील पोलिस उपनिरीक्षक समीर अल्ताफ, वाहन चालक इरफान रसुल, पाेलिस कॉन्स्टेबल बिलाल अहमद, नेहराजउद्दीन या पथकाने येथे येऊन संदीपला ताब्यात घेतले असून, जम्मूला रवाना झाले आहेत.