'नाधों'च्या काव्याने महोत्सवाची सांगता

अमृतमहोत्सवी वर्षानिमित्त केला सन्मान

म. टा. प्रतिनिधी, जळगाव

परिवर्तन संस्थेतर्फे आयोजित अभिवाचन महोत्सवाचा समारोप नुकताच पद्मश्री ना. धो. महानोर यांच्या काव्यवाचनाने व गीतांनी करण्यात आला. यावेळी अमृतमहोत्सवी वर्षानिमित्त कविवर्य महानोर यांचा सत्कारही करण्यात आला.

या कार्यक्रमामध्ये 'शब्दाचा हा खेळ मांडला', 'नभ उतरू', 'बाळगु कशाला व्यर्थ कुणाची भीती', 'पिक करपलं', 'मी रात टाकली', 'लावणी राजसा जवळी बसा', 'जाळ्यात पाखरू', 'जांभुळ पिकल्या झाडाखाली' ही गाणी सादर झाली. प्रिया सायखेडकर, जितेश मराठे, संगीता म्हस्कर, सुदीप्ता सरकार यांनी या गितांना कोरस दिले. तर कलावंत कुंदन तायडे, शिरीष शर्मा, आरती गोरे, प्रियंका यांनी ही गीते म्हटली. त्यांना तबल्यावर तेजस मराठे ,कॅसीओवर आप्पा नेवे यांनी साथसंगत दिली. कार्यक्रमाचे निवेदन शंभू पाटील यानी केले. त्यांनी महानोरांच्या कवितेची वैशिष्ट्यही विषद केली.

कवितेचे अभिवाचन जैन समूहाचे अध्यक्ष अशोक जैन, जिल्हाधिकारी किशोर राजे निंबाळकर, सीईओ कौस्तुभ दिवेगावकर, पत्रकार विजय बाविस्कर, अनिल पाटकर, राहुल निंबाळकर, दीपा लोढा, प्रीती झारे, मनोज पाटील यांनी केले. महानोरांना महाराष्ट्र सरकारच्या वतीने शुभेच्छा जिल्हाधिकारी निंबाळकर यांनी दिल्या. तसेच महानोरांच्या शेतीच्या कार्याचा गौरव करून जुन्या आठवणींना उजाळा दिला. कविवर्य महानोरांचा अमृत महोत्सवी सन्मान अनोख्या पद्धतीने करण्यात आला. याप्रसंगी ज्वारीची कणसे, सन्मानचिन्ह, मानपत्र, पुस्तक देऊन त्यांचा सन्मान करण्यात आला. यावेळी महापौर ललित कोल्हे, कवी अशोक कोतवाल, नारायण बाविस्कर, मंजुषा भिडे ,शहाजी पाटील आदी उपस्थित होते. मानपत्र वाचन हर्षल पाटील यांनी केले.