जळगावात ‘पे अँड पार्क’ सेवा

पार्किंगचा प्रश्न लवकरच मार्गी

म. टा. प्रतिनिधी, जळगाव

शहरातील टॉवर चौक ते चौबे शाळा चौकापर्यंतच्या रस्त्यावरील पार्किंगचा प्रश्न लवकरच मार्गी लागणार आहे. जुनी नगरपालिका आणि साने गुरुजी रुग्णालयाच्या जागेवर ‘पे अँड पार्क सेवा’ या आठवड्याच्या अखेरीस सुरू होणार आहे. त्यासाठी या दोन्ही जागांवर कामास सुरुवात करण्यात आली आहे.

जुनी नगरपालिका आणि साने गुरुजी रुग्णालयाची जागा गेल्या अनेक वर्षांपासून मोकळीच असल्याने त्याठिकाणी ‘पे अँड पार्क सेवा’ सुरू करण्याचे महापालिकेने ठरविले होते. या सेवेचा ठेका मनीषा दीपक शिंपी यांच्या न्यू हिंदुस्थान सिक्युरिटी सर्व्हिसेसला देण्यात आला आहे. त्यामधून दोन्ही जागेवर ‘पे अँड पार्क सेवा’ तीन वर्षांसाठी राबविण्यासाठी ९ लाख ८२ हजारात मक्ता देण्यात आला असून, ३ लाख रुपयांची बँक गँरंटी मनपाने घेतली आहे.

असे राहतील दर...
‘पे अँड पार्क’ जागेवर प्रती तीन तासांसाठी आकारणी करण्यात येणार आहे. त्यामध्ये दुचाकीसाठी १० रुपये तर तीन आणि चारचाकीसाठी २० रुपये आकारण्यात येणार आहे. तीन तासानंतर पुढील तीन तासासाठी प्रती वाहन ५ रुपये वाढ करण्यात येणार असल्याची माहिती दीपक शिंपी यांनी दिली. पार्क सुविधा करताना मैदानाच्या चौफेर लोखंडी जाळी बसविण्यात आली आहे. आत आणि बाहेर असे दोन गेट उभारण्यात येत असून, वाहनांच्या सुरक्षेसाठी सुरक्षारक्षक, सीसीटीव्ही कॅमेऱ्यांची व्यवस्था करण्यात येणार असल्याची माहितीही त्यांनी दिली.