खून प्रकरणाच्या तपासासाठी अधीक्षकांची रुग्णालयात भेट

म. टा. प्रतिनिधी, जळगाव
मनसेचे माजी पदाधिकारी घनशाम दीक्षित यांच्या खूनप्रकरणाच्या तपासासाठी पोलिस अधीक्षक डॉ. पंजाबराव उगले यांनी रविवारी रात्री १०.३० वाजता वैद्यकीय महाविद्यालय भेट दिली. सनी याचा साथीदार तथा चंद्रकांत पाटील खून खटल्यातील संशयित आरोपी लखन मराठे उर्फ बोबड्या याची डॉ. उगलेंनी रुग्णालयात जाऊन चौकशी केली. दीक्षित यांच्या खूनप्रकरणी उधारीच्या पैशांचा वाद असल्याचे संशयितांनी सांगितले असले तरी या कारणामुळे खून होऊ शकतो यावर पोलिसांनादेखील विश्वास बसलेला नाही. त्यामुळे पोलिस यंत्रणा अद्याप या गुन्ह्याची पाळेमुळे शोधत आहेत. संशयित सनी याच्यावर यापूर्वीदेखील चंद्रकांत पाटील याचा खून केल्याचा गुन्हा दाखल आहे. यातील एक संशयित चेतन आळंदे उर्फ चिंग्या सध्या कारागृहात आहे. तर दुसरा संशयित बोबड्या सध्या वैद्यकीय महाविद्यालयात उपचार घेतो आहे, तिसरा संशयित मुंबई येथे खासगी कामानिमित्त गेला आहे. त्यामुळे सनी हा कोणाच्या संपर्कात होता, याची माहिती पोलिस घेत आहेत. या गुन्ह्यात मोहनीराज व सनी यांच्याशिवाय आणखी इतरांना सहभाग असण्याची शक्यता पोलिसांना आहे. त्या अनुशंगाने पोलिसांनी रविवारी रात्रीपासून तपासाला सुरुवात केली. अटक केलेल्या मोहनीराज व सनी या दोघांना सोमवारी न्यायाधीश अक्षी जैन यांच्या न्यायालयात हजर करण्यात आले. सुनावणीअंती दोघांना २९ ऑगस्टपर्यंत पोलिस कोठडी सुनावण्यात आली आहे.