आवास योजनेतून घरासाठी कैद्याची आर्त हाक!

म. टा. प्रतिनिधी, जळगाव

मला जन्मठेपेची शिक्षा झाली आहे, दोन्ही मुलांचे भविष्य घडविण्यासाठी आई व पत्नीचे हाल होत आहेत. माझे घर कच्चे असून, माझ्या मुलांचे भविष्य व माझ्या पुनर्वसनाचा विचार करून पंतप्रधान आवास योजनेचा लाभ द्यावा, अशी आर्त हाक नाशिक कारागृहात जन्मठेपेची शिक्षा भोगणाऱ्या कैद्याने केली आहे. या कैद्याने जळगाव महापालिकेकडे पोस्टाने अर्ज पाठवून ही विनंती केली असून, हस्तलिखित अर्जात कागदपत्रांसाठी मार्गदर्शन करण्याची विनंतीदेखील करण्यात आली आहे.

केंद्र व राज्य सरकारकडून पंतप्रधान आवास योजना राबविण्यात येत आहे. जळगाव शहरासाठी महापालिका प्रशासनाकडूनदेखील या योजनेची प्रक्रिया सुरू आहे. या योजनेसाठी ऑनलाइन अर्ज स्वीकारण्यात आले आहेत. मात्र, या योजनेसाठी एक हस्तलिखित अर्ज प्राप्त झाला आहे. या अर्जातील स्वच्छ व सुंदर हस्ताक्षराने त्याकडे अधिकारी व कर्मचारी यांचे लक्ष वेधून घेतले आहे. अर्ज वाचल्यानंतर आवास योजनेचा लाभ मिळविण्यासाठी नाशिक रोड मध्यवर्ती कारागृहात जन्मठेपेची शिक्षा भोगणाऱ्या एका कैद्याने हा अर्ज केल्याचे लक्षात आले.

पिंप्राळा परिसरातील रहिवासी असलेला तरुण खुनाच्या गुन्ह्यात नाशिक येथील कारागृहात जन्मठेपेची शिक्षा भोगत आहे. पिंप्राळा परिसरात आई व पत्नी व २ मुले जुन्या घरात वास्तव्य करीत आहेत. आई व पत्नी या काम करून घर चालवित असल्याचे या तरुणाने अर्जात म्हटले आहे. मुलांच्या भविष्याच्या दृष्टीने घर पक्के करणे आवश्यक असल्याने केंद्र सरकारने दिलेल्या आवास योजनेचा लाभ मिळावा, अशी मागणी त्याने या अर्जाद्वारे केली आहे. या आवास योजनेसाठी आवश्यक असलेले निकष पूर्ण करण्याची तयारी असल्याचेही त्याने म्हटले आहे. त्यासाठी घराचा पत्ता व पत्नीचा मोबाइल क्रमांक यात दिला असून, पत्नीकडून कागदपत्रे मिळवावे, असेही त्याने या अर्जात म्हटले आहे.

कैद्याच्या या अर्जाला महापालिका प्रशासनानेही प्रतिसाद दिला आहे. त्याच्या अर्जानुसार बांधकाम अभियंता चंद्रकांत सोनगिरे यांनी त्याच्या पत्नीशी संपर्क करून त्यांना या योजनेची संपूर्ण माहिती देत आवश्यक कागदपत्रांबाबत माहिती दिली. आज (दि. १४) त्याच्या पत्नी आवास योजनेसाठी अर्ज भरणार असल्याची माहिती सोनगिरे यांनी दिली.