‘पुरुषोत्तम’ स्पर्धेची आजपासून पर्वणी

तीन दिवसांत १८ एकांकिकांचे सादरीकरण

म. टा. प्रतिनिधी, जळगाव

पुरुषोत्तम करंडक आंतरमहाविद्यालयीन तीन दिवसीय एकांकिका स्पर्धेच्या प्राथमिक फेरीचे आज (दि. २८) सकाळी १० वाजता भैयासाहेब गंधे सभागृह येथे उद्घाटन होणार आहे. पहिल्या दिवशी पाच एकांकिका सादर होतील.

केसीई संस्थेच्या अमृत महोत्सवाच्या वाटचालीनिमित्त महाराष्ट्र कलोपासक, पुणे आणि मू. जे. महाविद्यालयाच्या नाट्यशास्त्र विभागाच्या संयुक्त विद्यमाने ही स्पर्धा आयोजित केली जात आहे. मू. जे. चा विभाग सलग तिसऱ्यांदा या स्पर्धेचे यजमानपद भूषवित आहे. स्पर्धेच्या उद्घाटनावेळी प्रयोग परीनिरीक्षण मंडळ सदस्या प्रा. शमा सराफ, लोककलावंत विनोद ढगे, महाराष्ट्र कलोपासक संस्थेचे समन्वयक राजेंद्र नांगरे, केसीई संस्थेचे सदस्य प्रा. चारुदत्त गोखले, सांस्कृतिक समन्वयक शशिकांत वडोदकर, प्राचार्य डॉ. उदय कुलकर्णी उपस्थित राहतील. स्पर्धेसाठी अकरा समित्या स्थापन करण्यात आल्या असून, विभागाचे समन्वयक हेमंत पाटील, दिनेश माळी, राकेश वाणी परिश्रम घेत आहेत.

एकांकिकांचे वेळापत्रक...

आज (दि. २८) डॉ. बेंडाळे महाविद्यालयाच्या मास मीडिया विभागाची ‘मेड फॉर इच अदर’, डॉ. बेंडाळे महाविद्यालयाची ‘पूर्णविराम’, गाडगेबाबा अभियांत्रिकी महाविद्यालय, भुसावळची ‘कॅफे मुसाफीर’, एसएसबीटी संस्थेची ‘लाल चिखल’, नूतन मराठा महाविद्यालयाची ‘हलगी सम्राट’ या एकांकिका सादर होणार आहेत.

उद्या (दि. २९) महात्मा गांधी संस्था, चोपडा येथील महाविद्यालयाची ‘सेकंड हँड’, प्रताप महाविद्यालय अमळनेरची ‘पॉज’, नाहाटा महाविद्यालय, भुसावळची ‘भोग’, कोटेचा महाविद्यालय, भुसावळची ‘मी’, रायसोनी अभियांत्रिकी महाविद्यालय, जळगावची ‘आम्ही फक्त कॉम्प्रमाइज करतो’, महात्मा गांधी संस्था, चोपडा येथील महाविद्यालयाची ‘ब्रेन’, नाहाटा महाविद्यालय, भुसावळची ‘आलं का?’ या सादर होतील.

रविवारी (दि. ३०) शिवाजी संस्था, धुळेच्या महाविद्यालयाची ‘अडमतडम’, शासकीय अभियांत्रिकी महाविद्यालय, औरंगाबाद येथील ‘चने द्या चने’, ए. आर. ए. कॉलेज ऑफ फार्मसी, नगाव, धुळे यांची ‘ओ व्हर्सेस ओ’, नेहरू अभियांत्रिकी महाविद्यालय, औरंगाबाद यांची ‘रूही’, घागरे विज्ञान महाविद्यालय, धुळे यांची ‘ब्रेन वॉश’, देवगिरी महाविद्यालय, औरंगाबाद यांची ‘आगाज’ या एकांकिका सादर होतील.