जळगावात पावसाच्या सरी

म. टा. प्रतिनिधी, जळगाव

शहरात व परिसरात आज शनिवारी (दि. ७) परतीच्या पावासाच्या जोरदार सरी सायंकाळी कोसळल्या. दुपारपासून ढगाळ वातावरणामुळे काळोख झाला होता, त्यानंतर दहा ते पंधरा मिनिटांनी पावसाच्या सरी थांबल्या.

जळगाव शहरात यंदाच्या पावसाळ्यात समाधानकारक पाऊस झालेला नाही. गणेश स्थापना व नवरात्रोत्सवाच्या दिवशी पावसाने हजेरी दिली होती. त्यानंतर मात्र जळगावात पाऊस झाला नाही. गेल्या काही दिवसांपासून जळगाव शहरात संमिश्र प्रकारच्या वातावरणाचा अनुभव येत आहे. दिवसभर लख्ख ऊन, सायंकाळी रात्र उकाडा व पहाटे काहीवेळ हलकीशी थंडीही जाणवत आहे. शनिवारी, सकाळी ऊन होते त्याने दिवसभर प्रचंड उकाडा जाणवत होता. दुपारी अचानक वातावरणात बदल होऊन ढगाळ वातावरण झाले होते. त्यानंतर सायंकाळी अचानक जोरदार पावसाच्या सरींनी जळगाव चिंब केले होते. अवघ्या पंधरा मिनिटातच हा पाऊस थांबला. अचानक आलेल्या या पावसामुळे जळगावकरांची तारांबळ उडाली होती.