मध्यरात्रीच्या पावसाने जळगाव चिंब

म. टा. प्रतिनिधी, जळगाव

जळगाव गेल्या काही दिवसांपासून हुलकावणी देणाऱ्या पावसाने बुधवारी (दि. २६) सायंकाळी साडेसात वाजेपासून हजेरी लावली. पुन्हा मध्यरात्रीनंतर सुरू झालेला पाऊस गुरुवारी (दि. २७) सकाळी १० वाजेपर्यंत सुरुच होता. या पावसाने अवघे जळगाव शहरात ठिकठिकाणी पाणी साचले होते. बारा तासांपेक्षा अधिक वेळ सुरू असलेल्या या पावसामुळे शहरातील सर्व नाले व ओढे ओसंडून वाहू लागले होते. शहरातील रस्त्यावरदेखील पावसाचे पाणी साचल्याने त्यातून वाट काढताना नागरिकांना, वाहनचालकांना कसरत करावी लागत होती.

गेल्या काही दिवसांपासून समाधानकारक पाऊस नसल्याने हताश झालेल्या जळगावकरांना बुधवारी सायंकाळपासून सुरू झालेल्या दमदार पावसाच्या संततधारेमुळे दिलासा दिला. सायंकाळी सुरू झालेला हा पाऊस रात्रभर बरसत राहीला. या पावसामुळे जळगाव शहरातील लेंडी नाला, दवंड्या नाल्यासह पाचही नाल्यांना चांगले पाणी आले होते. शहरातील रस्त्यावर असलेले खड्डे व सखल भागांमध्ये पावसाचे पाणी साचले होते.

कोर्ट चौक, आकाशवाणी चौक व गणेश कॉलनी चौकात गटारी ओव्हरफ्लो होऊन पावसाचे पाणी रस्त्यावर साचले होते. नवीपेठ परिसरातील गल्ल्याही पाण्याने भरल्या होत्या. रस्त्यांच्या या खड्ड्यांमध्ये पाणी साचून वाहन धाकरकांना कसरत करावी लागत होती. इच्छादेवी मंदिराच्या आवारातदेखील गुडघ्याइतके पाणी साचले होते.

घरांमध्ये पाणी भरले

शहरातील शाहू नगरातील तेज पान सेंटरच्या गल्ल्यांमध्ये पाणी साचले होते. तसेच या भागातील घरांमध्येदेखील गटारी तुंबल्याने पावसाचे पाणी घरात घुसले होते. त्यामुळे नागरिकांना घरातून पाणी काढताना कसरत करावी लागत होती.