रेशन दुकानदारांचा बंदचा इशारा

म. टा. प्रतिनिधी, जळगाव

रेशन दुकानदारांना वाटपासाठी मिळणाऱ्या धान्य साठ्यासोबत मानधन सुरू करण्यासाठी येत्या १ ऑगस्टपासून राज्यभरातील रेशनिंग दुकानदार संप पुकारणार आहे, अशी माहिती संघटनेचे अध्यक्ष गजानन बाबर यांनी सांगितले. या संपादरम्यान मालसुद्धा उचलणार नसल्याचेही त्यांनी सांगितले. ऑल महाराष्ट्र फेअर प्राईज शॉपकिपर्स व हॉकर्स परवानाधारक संघटना फेडरेशनची राज्यस्तरीय बैठक जिल्हा पत्रकार संघात आज दि. २ जून रोजी सकाळी १० वाजता आयोजित करण्यात आली होती. बैठकीच्या अध्यक्षस्थानी संघटनेचे अध्यक्ष गजानन बाबर होते.

राज्यभरात ५५ हजार रेशन दुकानदार आहे. रेशन दुकानदारांच्या मागण्यांसाठी तीन वर्षापासून संघटना लढा देत असून, वेळोवेळी जिल्हाधिकारी, मंत्री यांना निवेदन देण्यात आले, मंत्र्यांशी चर्चा करण्यात आली, अशी मा‌हिती कार्यक्रमाच्या प्रास्ताविकात भाटिया यांनी दिली. बैठकीस जळगाव, हिंगोली, नांदेड, पुणे, नाशिक, जिल्ह्यांतील रेशन दुकानदार उपस्थित होते.