‘जय श्रीराम’च्या जयघोषात रावणदहन

आतषबाजीने दणाणला परिसर; रोषणाईने वेधले लक्ष

म. टा. प्रतिनिधी, जळगाव

एल. के. फाउंडेशनतर्फे विजया दशमीनिमित्त मंगळवारी (दि. ८) सायंकाळी मेहरूण तलाव येथे ५१ फुटी रावणाचे मान्यवरांच्या हस्ते रिमोट कंट्रोलने बटन दाबून रावणाच्या प्रतिमेचे दहन करण्यात आले. या वेळी झालेल्या आतषबाजीने परिसर दणाणला होता तर फटाक्यांच्या नेत्रदीपक रोषणाईने लक्ष वेधून घेतले होते.

कार्यक्रमाच्या व्यासपीठावर खासदार उन्मेश पाटील, आमदार सुरेश भोळे, आमदार चंदुलाल पटेल, गुरूमुख जगवाणी, महापौर सीमा भोळे, विरोधीपक्ष नेते सुनील महाजन, सभागृह नेते ललित कोल्हे, स्थायी समिती सभापती जितेंद्र मराठे, उपगटनेते राजेंद्र घुगे पाटील, नगरसेवक प्रवीण कोल्हे, अनंत जोशी, मुकुंदा सपकाळे, विष्णू भंगाळे, ॲड. सुनील पाटील, पार्वताबाई भिल, पियुष कोल्हे आदी उपस्थित होते. रावण दहनानंतर फटाक्यांची आकर्षक रोषणाई करण्यात आली.

परदेशी नागरिकांची उपस्थिती
यंदाच्या रावण दहन कार्यक्रमाप्रसंगी विदेशी पाहुण्यांची देखील उपस्थिती लाभल्याचे पहावयास मिळाले. यावेळी येथील नागरीकांतून विदेशी नागरीकांसोबत सेल्फी काढण्यात आले. मेहरूण तलाव येथे दरवर्षी रावण दहनाच्या कार्यक्रमाचे आयोजन करण्यात येत असते. यंदादेखील ५१ फुटी रावणाच्या प्रतिकृतीचे दहन करण्यात आले. हा नजारा पाहण्यासाठी हजारो नागरीकांनी सायंकाळी मेहरूण तलाव येथे उपस्थिती दिली होती. रावण दहनाच्या कार्यक्रमानंतर सुमारे अर्धातास वाहतुकीची कोंडी निर्माण झाली होती.