आमदार परिचारकांचा राजीनामा घ्यावा

रयत सेनेची मुख्यमंत्र्यांकडे मागणी

म. टा. वृत्तसेवा, चाळीसगाव

आमदार प्रशांत परिचारक यांच्या बेताल वक्तव्यामुळे भारतीय सैन्य आणि त्यांच्या पत्नींची मानहानी झाली आहे. परिचारकच्या लांच्छनास्पद वक्तव्यांमुळे देशवासियांच्या भावना दुखावल्या आहेत. त्यांच्यासारखा आमदार विधानपरिषदेत असणे हा अवमान असून त्यांच्यावर राष्ट्रद्रोहाचा गुन्हा दाखल करून त्यांचा राजीनामा घ्यावा, अशी मागणी रयत सेनेकडून मुख्यमंत्र्यांकडे करण्यात आली आहे. तसे निवेदन रयत सेनेकडून बुधवारी (दि. २२) येथील तहसीलदार कैलास देवरे यांना सोपविण्यात आले.

या वेळी रयत सेनेचे अध्यक्ष गणेश पवार, नगरसेवक सूर्यकांत ठाकूर, जयश्री रणदिवे, मयूर चौधरी, संजय कापसे, दीपक राजपूत, प्रमोद वाघ आदी उपस्थित होते. निवेदनाची एक प्रत केंद्रीय संरक्षण राज्यमंत्री डॉ. सुभाष भामरे यांनाही रवाना करण्यात येणार आहे. देशाचे रक्षण करणाऱ्या जवानांविषयी त्यांनी केलेले विधान संताप निर्माण करणारे आहे. संपूर्ण देशवासी लष्करामुळेच निवांत राहतात. सैनिक हे जिवाची पर्वा न करता देशाच्या सीमांचे रक्षण करतात. आमदार परिचारक यांनी हे वक्तव्य करून राष्ट्रभक्तीचा अवमान केला आहे. म्हणून त्यांच्यावर राष्ट्रदोहाचा गुन्हा दाखल करून त्यांच्या आमदारकीचा राजीनामा घ्यावा, अशी मागणी या निवेदनाद्वारे करण्यात आली आहे. आमदार प्रशांत परिचारक यांचा रयत सेना व वीर भगतसिंग विद्यार्थी परिषदेच्या वतीने यावेळी निषेध करण्यात आला.