स्मशानभूमीचे आज नूतनीकरण

म. टा. प्रतिनिधी, जळगाव

जळगावातील शिवाजी नगर येथील स्मशानभूमीचे नूतनीकरणाचे काम महापालिका प्रशासनाने हाती घेतले आहे. शहरातील रेमंड कंपनीतर्फे यासाठी खर्च करण्यात येणार आहे. आज (दि. ५) या कामाचा शुभारंभ माजी मंत्री सुरेश जैन यांच्या हस्ते करण्यात येत असल्याची माहिती महापौर ललित कोल्हे यांनी दिली.

शिवाजी नगरातील स्मशानभूमीची गेल्या काही वर्षात दुरवस्था झाली होती. महापालिकेच्या आवाहनाला प्रतिसाद देत रेमंड कंपनीने या स्मशानभूमीचे नूतनीकरण करण्याची तयारी दर्शविली आहे. सध्या स्मशानभूमीत केवळ ३ ओटे आहेत. या ठिकाणी आणखी दोन ओटे वाढविण्यात येणार आहेत. तसेच या ५ ओट्यांना लोखंडी कठडे बसविण्यात येणार आहे. स्मशानभूमी भोवताली संरक्षक कंपाऊंड करण्यात येणार आहे. माजी मंत्री सुरेश जैन यांच्या हस्ते स्मशानभूमीच्या नूतनीकरणाच्या कामाचा शुभारंभ आज (दि. ५) सकाळी ११ वाजता करण्यात येणार आहे. पिंप्राळा परिसरातील स्मशानभूमीचीही कित्येक वर्षांपासून दुरुस्ती झालेली नाही.त्यासाठी शहरातील स्वयंसेवी संस्थानी यासाठी पुढे येण्याचे आवाहन महापौरांनी केले आहे.