५ दरोडखोर मध्यरात्री घरात घुसले, दाम्पत्यांसह मुलासोबत जे घडलं, त्यानं जळगाव हादरलं

जळगाव: शहरातील गुड्डू राजा नगरातील ढाके नगर येथे धाडसी दरोडा पडल्याची घटना शुक्रवारी दुपारी एक वाजेच्या सुमारास समोर आली आहे. या घटनेत दरोडेखोरांनी चाकू, कुऱ्हाड तसेच लाकडाचा धाक दाखवून घरातून पन्नास हजाराची रोकड आणि दहा ग्रॅमची सोन्याची चेन तसेच दुचाकी घेऊन पोबारा केल्याची माहिती मिळाली आहे. या घटनेने परिसरात मोठी खळबळ उडाली असून नागरिकांमध्ये भीतीचे वातावरण पसरले आहे.

जळगाव शहरातील गुड्डू राजा नगर परिसरातील ढाके नगरात प्रमोद घाडगे हे पत्नी आणि मुलासह वास्तव्यास आहेत. त्यांचा कुरिअरचा व्यवसाय आहे. मुलगा सुद्धा प्रमोद घाडगे यांच्यासोबत कुरिअरचाच व्यवसाय करतो. गुरुवारी पहाटे ३ वाजता दरवाजाचा कडीकोयंडा तोडून पाच दरोडेखोर प्रमोद घाडगे यांच्या घरात घुसले.

चाकू कुऱ्हाड तसेच लाकडं त्यांच्या हातात होती. त्यापैकी खालच्या खोलीत झोपलेल्या प्रमोद घाडगे आणि त्यांच्या पत्नी या दोघांना दररोखोरांनी पैसे कुठे आहेत, अशी विचारणा केली. तसेच, घरात कोण कोण आहे हे सुद्धा विचारले. घाडगे यांनी मुलगा वरच्या खोलीत झोपला आहे, असे सांगितल्यावर तीन दरोडेखोर वरच्या खोलीत गेले व मुलाची कॉलर पकडून त्याला सुद्धा खाली घेऊन आले.

दुचाकीची चावी घेतली अन् दुचाकीही सोबत घेवून गेले

तिघांना खाली बसवून दरोडेखोर पुन्हा वरती गेले कपाटातील सामान अस्ताव्यस्त फेकून त्यांनी पन्नास हजाराची रोकड तसेच प्रमोद घाडगे यांच्या गळ्यातील एक तोळ्याची सोन्याची चेन घेतली. त्यानंतर दरोडेखोरांनी घाडगे यांच्या दुचाकीची चावी घेतली, तसेच बाहेर अंगणात हातातील लाकडं फेकून घाडगे यांची गाडी घेत त्या दुचाकीवरून पोबारा गेला.

दरम्यान, घटनेची माहिती मिळाल्यानंतर शहर पोलीस ठाण्याचे पोलीस निरीक्षक विजयसिंग ठाकूरवाड तसेच कर्मचाऱ्यांनी घटनास्थळी भेट देत पाहणी केली. याप्रकरणी शहर पोलीस ठाण्यात गुन्हा दाखल करण्याचे काम सुरू होते. दरम्यान, या धाडसी दरोड्याच्या घटनेने जळगाव शहरात मोठी खळबळ उडाली आहे.