धावता ट्रक पेटल्याने धावपळ

म. टा. प्रतिनिधी, जळगाव

रस्ता ओलांडून गेलेल्या वीज तारांना ट्रकमधील बारदानचा स्पर्श झाल्याने बारदानसह ट्रकने पेट घेतल्याची घटना मंगळवारी (दि. २३) दुपारी अडीच वाजता एमआयडीसीतील सी-सेक्टरमधील हॉटेल वासूमित्रासमोर घडली. वेळीच उडी मारल्याने चालक आवटे यांचे प्राण वाचले.

एमआयडीसीतील एका कंपनीतून विष्णू बबन आवटे (रा. सुप्रीम कॉलनी) हे ट्रकमध्ये बारदान भरून दुसऱ्या कंपनीत जात होते. सी-सेक्टरमध्ये मुख्य रस्ता ओलांडून गेलेल्या वीजवाहिनीच्या तारांना बारदानचा स्पर्श झाला, त्यामुळे आगीची ठिणगी बारदानवर पडली. काही क्षणातच स्पार्किंग होऊन मोठा आवाज झाला. आगीचे मोठे लोळ पाहून रस्त्याने जाणाऱ्या लोकांनी तत्काळ घटनास्थळी धाव घेऊन आग विझविण्याचा प्रयत्न केला. आगीची माहिती मिळाल्यानंतर एमआयडीसी पोलिस ठाण्याचे उपनिरीक्षक अमोल सोनवणे, सहायक फौजदार अतुल वंजारी, विजय नेरकर व जितेंद्र राजपूत यांनी घटनास्थळी धाव घेऊन अग्निशमन बंब मागविले. चार बंबाद्वारे ही आग विझविण्यात आली. बंब यायला उशीर लागल्याने लोकांनी ट्रकमध्ये चढून बारदान बाहेर काढले. या आगीत ट्रकचेही नुकसान झाले असून, या प्रकरणी एमआयडीसी पोलिस ठाण्यात नोंद करण्यात आली आहे.