म. टा. वृत्तसेवा, धुळे
नंदुरबार जिल्ह्यातील सारंगखेडा येथील महानुभाव संप्रदायाच्या एकमुखी दत्तप्रभूंच्या यात्रेला रविवारपासून सुरुवात होणार आहे. या यात्रेची तयारी आता अंतिम टप्प्यात आली असून, यात्रेत महाराष्ट्रासह निरनिराळ्या राज्यातून येणाऱ्या पर्यटकांसाठी ७० तंबू उभारण्यात आले आहेत. यात्रेतील घोडे बाजारात देशभरासह विदेशातून अश्वप्रेमी दाखल होणार आहेत. तसेच रविवारी श्री दत्तजयंतीच्या दिवशी पाच हजार भाविकांच्या हस्ते सामूहिक आरती करण्यात येईल, अशी माहिती सारंगखेडा चेतक फेस्टिव्हलचे मुख्य आयोजक जयपालसिंह रावल यांनी पत्रकार परिषदेत दिली.
यावेळी रावल यांनी सांगितले की, छत्रपती शिवाजी महाराज तसेच औरंगजेबच्या काळात सारंगखेडा येथील घोडे बाजारातून घोडे खरेदी केले जात होते. त्यामुळे या यात्रेला ऐतिहासिक महत्त्व आहे. यात्रेनिमित्त भरणाऱ्या घोडे बाजारामुळे ही यात्रा महाराष्ट्रासह देशभरात प्रसिद्ध आहे. या यात्रेसाठी राज्यातील पर्यटन विभागाने पाच कोटींचा निधी मंजूर केला आहे. यंदा यात्रेत रशियन छायाचित्रकाराच्या छायाचित्रांचे प्रदर्शन भरविण्यात येणार आहे. त्यासाठी आवश्यक व्यवस्था करण्यात आली आहे. यात्रेसाठी येणाऱ्या व्हीआयपी व्यक्तींसाठी वातानुकूलित सभागृह तयार करण्यात आले आहे. यात्रेत येणाऱ्या पर्यटकांना घोड्यावरून सफारी करण्याची देखील व्यवस्था करण्यात आली आहे. यात्रेत होणाऱ्या चेतक फेस्टिव्हलमध्ये संपूर्ण महाराष्ट्रासह गुजरात, मध्यप्रदेश, आंध्रप्रदेश, पंजाब, उत्तरप्रदेश, कर्नाटक राज्यातील घोडे सहभागी होणार आहेत. घोडे बाजारात आतापर्यंत दोन हजाराहून अधिक घोडे विक्रीसाठी दाखल झाले आहेत. यंदा घोड्यांची संख्या चार हजारांपर्यंत असण्याची शक्यता आहे.
दोन जानेवारीपर्यंत यात्रा
सारंगखेडा चेतक फेस्टिव्हलचे रविवारी दुपारी तीन वाजता पर्यटनविकास मंत्री जयकुमार रावल यांच्यासह नंदुरबार जिल्ह्यातील लोकप्रतिनिधी, शासकीस अधिकाऱ्यांच्या उपस्थितीत उदघाटन होणार आहे. मुख्यमंत्री देवेंद्र फडणवीस ७ ते १० डिसेंबर दरम्यान यात्रेला भेट देणार आहेत. यात्रेत ३ डिसेंबर ते २ जानेवारी दरम्यान विविध मनोरंजनात्मक कार्यक्रम आयोजन करण्यात आले आहे.
‘चला हवा येऊ द्या’ ची टीम येणार
२६ डिसेंबर रोजी ‘चला हवा येऊ द्या’ या कार्यक्रमाचे चित्रिकरण होणार आहे. तसेच यात्रेच्या काळात चेतक फेस्टिव्हलतर्फे साधारण महिनाभर विविध कार्यक्रमांसह अश्वस्पर्धा, बोटिंग, घोडागाडी, बैलगाडी, उंटगाडी सवारीची मजा लुटता येणार आहे. देशभरातून येणाऱ्या पर्यटकांच्या निवासासाठी आकर्षक असे ७० तंबू उभारण्यात आले आहेत. यात्रेत मोठ्या प्रमाणावर पर्यटकांची हजेरी लक्षात घेता, त्याठिकाणी वैद्यकीय सुविधा, पिण्याच्या पाण्यासह सर्व प्रकारच्या सुविधा देण्यात येणार आहेत.