रावेरला ​ सातबारा संगणकीकरण काम अंतिम टप्प्यात

रावेर : रावेर तालुक्यात सातबारा संगणकीकरण व ई-फेरफार प्रणाली सुरू करण्यात आली असून, तालुकास्तरावर ई-म्युटेशन सेलची स्थापना करण्यात आल्याची माहिती तहसीलदार विजयकुमार ढगे यांनी मंगळवारी आयोजित पत्रकार परिषदेत दिली.

रावेर तालुक्यातील ११७ गावात ७४ हजार ४६२ सातबाराची संख्या असून, त्याबाबत नियोजनबद्ध पद्धतीने सातबारा संगणकीकरणाचे कामकाज व तालुकास्तरावर ई-म्युटेशन सेल स्थापन करण्यात आला आहे. या प्रणालीद्वारे सर्व तलाठी व मंडळ अधिकारी यांनी हस्तलिखित मूळ सातबारा व ऑनलाइन सातबारा उतारा तपासणी करून त्यात आढळून येणार्‍या चुकांबाबत दुरूस्ती प्रणालीद्वारे दुरूस्ती करण्यात आली आहे, असेही ढगे यांनी सांगितले. नागरिकांनी खात्री करावी म्हणून गाव दवंडी देऊन ठराविक दिवशी त्या-त्या गावांत सातबारा व गाव नमुना आठ 'अ'चे वाचन करण्यात आले असल्याची माहितीही तहसीलदारांनी दिली. दुरूस्ती प्रणालीचे ९८ टक्के काम पूर्ण झाले असून, पुन्हा दुरुस्तीच्या कामास सुरुवात करण्यात आली आहे. नागरिकांनी शासनाच्या संकेतस्थळावर सातबार्‍यांची पाहणी करून चुका असल्यास तत्काळ संबंधित तलाठी अथवा तहसील कार्यालयात लेखी कळवावे, असे आवाहन ढगे यांनी केले.