ज्येष्ठ नगरसेवक नरेंद्र पाटील अनंतात विलीन

म. टा. प्रतिनिधी, जळगाव

जळगाव जिल्हा मराठा विद्याप्रसारक संस्थेचे अध्यक्ष तथा ज्येष्ठ नगरसेवक नरेंद्र अण्णा भास्कर पाटील यांच्या पार्थिवावर सोमवारी अंत्यसंस्कार करण्यात आले. या वेळी राजकीय, सामाजिक क्षेत्रांतील मान्यवरांसह त्यांच्यावर प्रेम करणाऱ्या नागरिकांची गर्दी होती.

महापालिकेचे ज्येष्ठ नगरसेवक नरेंद्र अण्णा पाटील यांचे रविवारी सकाळी ७ वाजता पुणे येथे उपचार सुरू असताना निधन झाले होते. रात्री त्यांचे पार्थिव त्यांच्या दीक्षितवाडीतील निवासस्थानी आणण्यात आले. शहरातून मुख्य मार्गावरून त्यांची अंत्ययात्रा काढून नेरीनाका येथील वैकुंठधाम येथे त्यांच्यावर अंत्यसंस्कार करण्यात आले. या वेळी जलसंपदा मंत्री गिरीश महाजन, राज्यमंत्री गुलाबराव पाटील, आमदार एकनाथ खडसे, आमदार सुरेश भोळे, माजी मंत्री गुलाबराव देवकर, माजी महापौर रमेश जैन, ललित कोल्हे, नितीन लढ्ढा, आमदार हरीभाऊ जावळे यांच्यासह नागरिक उपस्थित होते.