रस्त्यावरील बांधकामाचे अपील फेटाळले

म. टा. प्रतिनिधी, जळगाव

मौजे मेहरूण शिवार सर्व्हे नं. ४१३ मधील भूखंड क्र. १६१ या जागेवर पार्किंगसह तीन मजले बांधण्याची मनपाने परवानगी दिली होती. त्यानंतर टीडीआर वापरून त्यावर दोन मजल्याची परवानगी मागितल्यानंतर मनपा प्रशासनाने ती नाकारली. याविरोधात श्रीकांत खटोड यांनी शासनाकडे अपील दाखल केले होते. यावर सुनावणी झाल्यानंतर नगरविकास राज्यमंत्री डॉ. रणजित पाटील यांनी बांधकाम व्यवसायिक श्रीकांत खटोड यांचे अपील फेटाळले.

मेहरूण शिवारातील सर्व्हे नं. ४३१ मधील भूखंड क्र. १६१ या जागेवर पार्किंगसह तीन मजली इमारत बांधकामासाठी मनपा प्रशासनाने दि. २६ जुलै २०१२ रोजी परवानगी दिली होती. त्यानुसार या जागेवर बांधकाम करण्यात आले. त्यानंतर बांधकाम व्यवसायिक श्रीकांत खटोड यांनी दि. ११ नोव्हेंबर २०१४ रोजी टीडीआर वापरून वाढीव दोन मजल्याची बांधकाम परवानगी द्यावी, त्यासाठी त्यांनी मनपा प्रशासनाकडे अर्ज केला होता.

परंतु, दि. ३ सप्टेंबर २०१२ च्या शासन निर्णयानुसार जळगाव

शहरासाठी विकास नियंत्रण

नियमावली मंजूर झाली. त्यातील तरतुदीनुसार सेवा रस्ता, इमारत रेषा व नियंत्रण रेषेबाबत पूर्तता झाली नसल्याने मनपा प्रशासनाने दि. १६ जानेवारी २०१५ व दि. २१ जुलै २०१५ च्या पत्रान्वये श्रीकांत खटोड यांचा अर्ज नामंजूर केला. याविरोधात खटोड यांनी शासनाकडे अपील केले होते.

या अपीलावर सुनावणी झाल्यानंतर नगरविकास राज्यमंत्री डॉ. रणजित पाटील यांनी खटोड यांचे अपील फेटाळले.