महावीर जयंतीनिमित्त शोभायात्रेचे आयोजन

सकल जैन समाजाकडून आज कार्यक्रम

म. टा. प्रतिनिधी, जळगाव

महावीर जयंती हा जैन धर्मीयांचा जिव्हाळ्याचा सण आहे. या पार्श्वभूमीवर आज (दि. २९) शहरात महावीर जयंती साजरी करण्यात येणार आहे. त्यासाठी विविध कार्यक्रमांचे आयोजनही करण्यात आलेले आहे.

जैन समाजबांधवांकडून आज (दि. २९) सकाळी ७ वाजून ३० मिनीटांनी ध्वजवंदना करून कार्यक्रमाला सुरुवात होणार आहे. या कार्यक्रमाचे उद्घाटन व दीपप्रज्वलन माजी मंत्री सुरेश जैन यांच्या हस्ते करण्यात येणार आहे. या वेळी उद्योजक रतनलाल बाफना, जैन उद्योग समूहाचे अध्यक्ष अशोक जैन, दलुचंद जैन, रमेश जैन, तेरा पंथीचे मनोज सुराणा आदी उपस्थित राहणार आहेत.

शहरातून आज, सकाळी ८ वाजेला शोभायात्रा काढण्यात येणार असून, ही शोभायात्रा टॉवर चौकापासून ते सुभाष चौकमार्गे बालगंधर्व सभागृहात समारोप होणार आहे. महावीर भगवान यांच्या जीवन चरित्राविषयी मानसी जेम यांचे व्याख्यान सकाळी ९.३० वाजता आयोजित करण्यात आले आहे. प्रमुख मान्यवरांच्या हस्ते देहदान करणाऱ्यांचा कुटुंबांतील व्यक्तीचा सत्कार करण्यात येणार आहे. यानंतर बालगंधर्व सभागृहात विविध कार्यक्रम होतील. या सर्व कार्यक्रमांचा जैन समाजबांधवांनी लाभ घ्यावा, असे अवाहन सकल जैन भगवान महावीर जन्मकल्याणक महोत्सव समितीचे अध्यक्ष दिलीप गांधी यांनी केले आहे.

‘चार गती’च्या प्रवासाचे प्रदर्शन

महावीर पाठशाळेच्या चिमुकल्यांकडून चार गतीच्या प्रवासाची प्रतिकृतीद्वारे माहिती देण्यात येणार आहे. महावीर पाठशाळेत चिमुकल्यांना वेळोवेळी आयोजित कार्यक्रमात धर्मसंस्कार दिले जातात. पाठशाळेत नरक गती, तिर्थंच गती, मनुष्य गती, देव गती याबाबत मार्गदर्शन केले जाते. जळगावातील प्रत्येकाला चार गतींचा प्रवास, पाप-पुण्यांचे परिणाम याची माहिती कळावी यासाठी प्रतिकृतींच्या माध्यमातून चिमुकल्यांचे प्रदर्शन आयोजित करण्यात आले आहे. अनुभूती स्कूल, बालगंधर्व खुले नाट्यगृहाजवळ प्रदर्शनाचे आयोजन करण्यात आले. सकाळी ८ ते दुपारी २ वाजेपर्यंत प्रदर्शन राहणार आहे.