'मूर्ती विक्रेत्यांना सागर पार्कला जागा द्या'

म. टा. प्रतिनिधी, जळगाव

गणेशमूर्ती विक्रेत्यांना सागर पार्क येथे मुर्ती विक्रीसाठी परवानगी द्यावी, अशी मागणी भाजपच्या नगरसेविका अ‍ॅड. शुचिता हाडा यांनी महापौरांना निवेदनाद्वारे केली आहे.

त्यांच्या प्रभाग क्र. २७ मधील आकाशवाणी चौक ते महाराणा प्रतापसिंह चौक येथे दरवर्षी रिंग रोड येथे गणेश मूर्ती व पूजेच्या सामानाचे विक्रेते दुकान थाटतात. त्यांच्यामुळे परिसरातील नागरिकांना महामार्गाचा वापर जाण्यायेण्यासाठी करावा लागतो. यामुळे या नागरिकांच्या जीवितास धोका होऊ शकतो, या विक्रेत्यांमुळे वृक्ष संवर्धनास अडचण निर्माण होत असल्याची तक्रारदेखील नगरसेविका हाडा यांनी निवेदनाद्वारे केली आहे. या विक्रेत्यांना सागर पार्क येथे स्टॉल लावण्यास परवानगी देऊन शाडू मातीच्या मुर्ती विक्रेत्यांना भाड्यात सूट देण्यात यावी, अशी मागणीही त्यांनी केली आहे.