सहा महिन्यांआधीच सेवानिवृत्तीचा घोळ

म. टा. प्रतिनिधी, जळगाव

महापालिकेत अठरा वर्षांपासून शिपाई म्हणून कार्यरत असलेल्या कर्मचाऱ्यास महापालिका प्रशासनाच्या गलथान कारभाराचा फटका बसला आहे. त्यांना सेवाकाळ संपण्याच्या सहा महिने आधीच सेवानिवृत्ती दिल्याचा धक्कादायक प्रकार समोर आला आहे. विशेष म्हणजे, ही चूक दुरुस्त व्हावी यासाठी या शिपायालाच पालिकेत चकरा माराव्या लागत आहेत. जगदीश दामले असे या कर्मचाऱ्याचे नाव आहे.

जगदीश दामले हे २००० पासून मनपात शिपाई म्हणून कार्यरत आहेत. त्यांची जन्मतारीख ही ६ मार्च १९५९ असताना, त्यांच्या सेवा पुस्तिकेवर त्यांची जन्मतारीख ६ मार्च १९५७ दाखवण्यात आली आहे. दरम्यान, सेवा पुस्तिकेवर मनपाकडून स्पष्टपणे खाडाखोड केल्याचे दिसत आहे. परिणामी, मनपाने त्यांना १७ ऑक्टोबर २०१८ रोजी आपल्या सेवेतून निवृत्त केले. यावर, दामले यांनी त्यांची निवृत्ती ही सहा महिने आधी होत असल्याने दामले यांनी मनपाला आपल्या अधिकृत जन्म दाखल्याची प्रतदेखील दाखवली. मात्र, अजूनही मनपाकडून त्यांना सेवेत घेतलेले नाही. दामले यांनी बुधवारी मनपा विरोधी पक्षनेते सुनील महाजन व नगरसेवक प्रशांत नाईक यांच्याकडे तक्रार दिली. यासंबंधी विरोधी पक्षनेत्यांनी आस्थापन विभागाकडून दामले यांच्या सेवानिवृत्तीबाबतची फाईल मागवली आहे. दरम्यान, मनपाचा भोंगळ कारभाराचा मुद्दा महासभेत मांडला जाईल, अशी माहिती विरोधी पक्षनेत्यांनी दिली.