सतरा मजलीत येणार सहा नवीन लिफ्ट

महापौर ललीत कोल्हे यांची माहिती

म. टा. प्रतिनिधी, जळगाव

मुख्यमंत्र्यांनी दिलेल्या २५ कोटी निधीपैकी ७ कोटींची एलईडी लाईट लावण्याबाबत निर्णय घेण्यात आला होता. परंतु, आता त्याऐवजी नाल्यालगत संरक्षण भिंतीचे बांधकाम करण्यात येणार आहे. तसेच मनपा इमारतीतील जुन्या लिफ्ट निष्कासित करून नवीन सहा लिफ्ट घेण्यात येणार असल्याची माहिती महापौर ललीत कोल्हे यांनी ‘मटा’शी बोलताना दिली.

जळगाव शहराच्या विकासासाठी मुख्यमंत्र्यांनी दिलेल्या २५ कोटीच्या निधीतून वगेवगळी विकासकामे करण्याबाबतची यादी निश्‍चित करण्यात आली होती. शहरात सर्वत्र ७ कोटींचे एलईडी लावण्याबाबत निर्णय घेण्यात आला होता. परंतु, एलईडी ऐवजी आता नाल्याला संरक्षण भिंत बांधण्यासह महापालिकेसाठी लिफ्ट घेण्यात येणार आहे. त्यामुळे अनेक दिवसांपासूनच्या लिफ्टच्या मागणीला मुहूर्त मिळणार आहे.

या विकासनिधीतून जळगाव शहरातील अनेक कामे केली जाणार असून, त्याबाबतची माहिती महापौर कोल्हे यांनी या वेळी बोलताना दिली. एकूण ७ कोटींची विकासकामे यामध्ये समाविष्ट आहेत.

विकासनिधीतील प्रस्तावित कामे..............रुपये

वाढीव भागात पोल उभारण्यासाठी............५१ लाख
नवीन सहा लिफ्ट घेण्यासाठी...................२ कोटी २५ लाख
राष्ट्रीय महामार्ग क्रमांक ६ पासून ते कब्रस्थानपर्यंतच्या नाल्यास संरक्षण भिंत.........१ कोटी ३१ हजार
गोपाळपुरा नाला ते जुना नशिराबाद रोडपर्यंतच्या नाल्यास संरक्षण भिंत................१ कोटी १७ लाख ७९ हजार
वाल्मिकनगर पुलापासून ते कोळीपेठ पुलापर्यंत नाल्यास संरक्षण भिंत...................४० लाख ६५ हजार
श्रीधरनगरजवळील नाल्याला संरक्षण भिंत......................५ लाख ५ हजार
खडेचाळपासून ते सुरत रेल्वे गेटपर्यंत दुभाजक व रंगकाम...............३७ लाख ७४ हजार
फुले मार्केटपासून ते एस. टी. वर्कशॉपपर्यंत दुभाजकाची उंची वाढविणे..........३७ लाख ५० हजार
मुख्य स्मशानभूमीसाठी गॅस दाहिनी..........................८५ लाख
एकूण.......................................६ कोटी ९५ लाख ९४ हजार