सामाजिक समता सप्ताहास प्रारंभ

म. टा. प्रतिनिधी, जळगाव

सामाजिक न्याय विभागातर्फे दि. ८ ते १४ एप्रिल या कालावधीत राबविला जात असलेल्या सामाजिक समता सप्ताहाचा प्रारंभ जिल्हाधिकारी किशोर राजे निंबाळकर यांच्या हस्ते करण्यात आला. यानिमित्त सामाजिक न्याय भवन येथे आयोजित कार्यक्रमात महात्मा जोतिबा फुले, राजर्षी छत्रपती शाहू महाराज, डॉ. बाबासाहेब आंबेडकर, यांच्या प्रतिमांचे पूजन करून अभिवादन करण्यात आले.

यावेळी जिल्हाधिकारी निंबाळकर, सहाय्यक आयुक्त समाज कल्याण योगेश पाटील, तसेच सर्व संलग्न महामंडळांचे प्रमुख अधिकारी उपस्थित होते. या सप्ताहात विविध उपक्रमांचे आयोजन करून योजना लाभार्थीपर्यंत पोहोचवा, असे आवाहन जिल्हाधिकारी निंबाळकर यांनी केले.

या सप्ताहानिमित्त आज (दि. ९) विविध महामंडळांमार्फत राबविण्यात येणाऱ्या अर्थसहाय्य व कर्ज योजनांची माहिती लाभार्थ्यांना दिली जाईल. तर सोमवारी (दि.१०) शाळा, कॉलेजेस, शासकीय अनुदानित वसतिगृहांमध्ये डॉ. बाबासाहेब आंबेडकर यांच्या जीवनावर लघुनाट्य, प्रश्नमंजूषा, वादविवाद स्पर्धांचे आयोजन केले आहे. मंगळवारी (दि. ११) रक्तदान शिबिर, व्यसनमुक्ती संदर्भात प्रबोधनपर कार्यक्रम तर बुधवारी (दि. १२) अनुसूचित जाती व नवबौद्धांच्या वस्त्यांमध्ये स्वच्छता अभियान होणार आहे. गुरुवारी (दि. १३) रोजी पत्रकार, सामाजिक कार्यकर्त्यांंसाठी व्याख्यान तर शुक्रवारी (दि. १४) डॉ. बाबासाहेब आंबेडकर जयंतीनिमित्त अभिवादन कार्यक्रम आयोजित केला आहे.