‘अमृत’च्या निविदा मान्यतेसाठी आज स्थायी सभा

म. टा. प्रतिनिधी, जळगाव

अमृत योजनेच्या पाणीपुरवठा योजनेसाठी निविदा प्रक्रिया राबविण्यात आली आहे. सर्वात कमी दर असलेल्या संतोष इन्फ्रा प्रा. लि. व विजय कंट्रक्शन या मक्तेदाराची निविदा मंजूर झाली. या निविदाधारकाला कार्यादेश देण्याच्या प्रस्तावासाठी आज (दि. ३) रोजी सकाळी ११ वाजता स्थायी समिती सभा सभापती वर्षा खडके यांच्या अध्यक्षतेखाली होणार आहे.

अमृत अंतर्गत २४९ कोटींची पाणीपुरवठा योजना मंजूर झाली. यातून १९६ कोटीच्या खर्चासाठी निविदा प्रक्रिया राबविण्यात आली. यात सर्वात कमी दराची संतोष इन्फास्ट्रक्चर प्रा. लि. व विजय कट्रक्शन प्रा. लि. या मक्तेदाराची निविदा मंजूर झाली. परंतु, त्या निविदाधारकाविरुद्ध हरकत घेतल्यामुळे महापौर व सर्वपक्षीय गटनेत्यांच्या बैठक झाली.

या बैठकीत मक्तेदाराच्या सक्षमतेबाबत मुद्दा उपस्थित करून समक्षता सीएमार्फत तपासण्याचा निर्णय झाला. त्यावेळी चुकीच्या पद्धतीने निकष गृहीत धरले असल्याचे आक्षेप अहवालात नोंदविण्यात आले. आयुक्तांकडे अहवाल सादर करण्यात आला आहे.