परतफेडीच्या रुपात महापालिकेला पावले बाप्पा!

‘हुडको’ कर्जाबाबत २५३ कोटींवर तडजोड; सरकार देणार रक्कम

म. टा. प्रतिनिधी, जळगाव

महापालिकेवर असलेल्या हुडकोच्या कर्जापोटी हुडकोशी एकरकमी कर्जफेडीची २५३ कोटी रुपयांची तडजोड होऊन ती हुडकोने मान्य केल्याची माहिती आमदार सुरेश भोळे यांनी दिली. ही पूर्ण रक्कम सरकार भरणार असून, त्यातील अर्धी रक्कम म्हणजेच १२६ कोटी ५० लाख रुपयांची रक्कम महिन्याला तीन कोटीप्रमाणे भरावे लागणार असल्याचेही भोळे यांनी सांगितले.

राज्य मंत्रिमंडळाच्या बैठकीत मनपावरील हुडकोच्या कर्जाची रक्कम सरकारने भरण्याचा निर्णय घेतला होता. मात्र, त्यावेळी हुडको २७१ कोटी रुपयांचा तडजोडीवर ठाम होती. तर सरकार व मनपाने हुडकोकडे २३३ रुपयांचा प्रस्ताव ठेवला होता. मात्र, हुडको किंवा सरकारच्या प्रस्तावापैकी कोणताही प्रस्तावावर तडजोड न काढता दोन्ही प्रस्तावातील मधलाच प्रस्तावावर हुडको व सरकारनेदेखील तयारी दर्शवली असून, आता सरकार मनपावरील कर्जापोटी हुडकोला २५३ कोटी रुपयांची एकरक्कमी रक्कम भरणार आहे. ही रक्कम लवकरच भरण्यात येणार असून, पुढील महिन्यापासून किंवा निवडणुकीनंतरच्या महिन्यापासून मनपाकडूनदेखील सरकारला महिन्याला तीन कोटी रुपयांचा हप्ता दिला जाणार आहे, अशी माहितीही आमदार भोळे यांनी या वेळी दिली.

४२ महिन्यांतच कर्जातून मुक्त
हुडको कर्जाच्या परतफेड करण्यासंदर्भात २५३ कोटी रुपयांवर तडजोड झाली आहे. आता सरकारने भरलेल्या रक्कमेच्या ५० टक्के रक्कम मनपाला सरकारला प्रतिमहिना तीन कोटींप्रमाणे भरावी लागणार आहे. मनपाला सरकरला एकूण १२६ कोटी ५० लाख रूपयांची रक्कम भरावी लागणार असून, नियमितप्रमाणे हप्ते भरल्यास ४२ महिन्यांतच म्हणजे साडे तीन वर्षांतच महापालिका कर्जातून देखील मुक्त होणार आहे.

गाळेप्रश्नही लवकरच सुटेल
गाळेधारकांवर आधी जे भाडे होते. ते गाळेधारकांच्या मते अवाजवी होते त्यामुळे थकीत भाड्याची रक्कम भरायला गाळेधारकांचा विरोध होता. मात्र, आता मनपाने केलेल्या पूनर्मूल्यांकनात गाळ्यांचा भाड्याचा रक्कमेत मोठी घट झाली असल्याने ती रक्कम गाळेधारक भरतील, अशी आशा आमदार सुरेश भोळे यांनी व्यक्त केली. गाळेधारकांकडून आलेल्या भाड्याचा रक्कमेतून सरकारला हुडकोपोटी भरलेली रक्कम भरण्याचा प्रयत्न मनपा प्रशासनाकडून सुरू आहे.