अटकपूर्व जामिनासाठी सुरेश जैन यांचा अर्ज

पतसंस्थेतील गैरव्यवहार प्रकरण

म. टा. प्रतिनिधी, जळगाव

जिल्ह्यातील जामनेर येथील सुरेशदादा जैन पतसंस्थेतील गैरव्यवहारप्रकरणी दाखल गुन्ह्यात अटकपूर्व जामीन मिळावा यासाठी माजी मंत्री सुरेश जैन यांनी जळगाव सत्र न्यायालयात सोमवारी (दि. १७) अर्ज सादर केला. या अर्जावर बुधवारी (दि. १९) कामकाज होणार आहे.

या पतसंस्थेकडून सुरेश जैन यांनी कर्ज घेतले होते. लेखा परीक्षक दीपक अट्रालवकर यांनी २० मे २०१६ रोजी संस्थेचा परीक्षण अहवाल सादर केला होता. त्यात संस्थेचे पदाधिकारी व कर्जदार अशा ३५ जणांचा अहवाल समाविष्ट होता. जिल्हा उपनिबंधक यांनी या अहवालाचे अवलोकन केल्यानंतर ३५ जणांवर गुन्हा दाखल करण्याचे आदेश दिले होते.

लेखापरीक्षक दीपक अट्रावलकर यांनी दिलेल्या फिर्यादीवरून जामनेर पोलिस स्टेशनला २९ जुलै २०१६ ला गुन्हा दाखल करण्यात आला होता. कर्जदार सुरेश जैन यांनी घेतलेल्या कर्जाची संपूर्ण परतफेड केली आहे. मात्र, संभाव्य अटकेपासून संरक्षण मिळावे यासाठी सुरेश जैन यांनी न्या. ज्योती दरेकर यांच्या कोर्टात अटकपूर्व जामीन अर्ज सादर केला. सरकार पक्षातर्फे जिल्हा सरकारी वकील अॅड. केतन ढाके कामकाज पाहात आहेत.