‘एसडी सीड’ शिष्यवृत्ती वितरण सोहळा आज

म. टा. प्रतिनिधी, जळगाव

सुरेशदादा शैक्षणिक व उद्योजक विकास योजनेमार्फत (एसडी सीड) प्रेमाबाई भिकमचंदजी जैन उच्चशिक्षण शिष्यवृत्ती उच्च शिक्षणासाठी दिली जाते. या शिष्यवृत्तीचा वितरण सोहळा आज (दि. १८) सकाळी १० वाजता छत्रपती संभाजीराजे नाट्य मंदिर, जळगाव येथे आयोजित करण्यात आला आहे.

या सोहळ्यास उद्योजक भारत विकास ग्रुप (बीव्हीजी) चे अध्यक्ष हणुमंतराव गायकवाड आणि माजी खासदार विजय दर्डा हे प्रमुख पाहुणे उपस्थित राहणार आहेत. या दरम्यान ते विद्यार्थ्यांना करिअर व उद्योजकता मार्गदर्शनपर प्रेरणादायी व्याख्यान देणार आहेत. गेल्या अकरा वर्षांत १३ हजारपेक्षा अधिक विद्यार्थ्यांना या शिष्यवृत्तीचा लाभ मिळाला आहे. त्यापैकी एकूण ३ हजार १०० पेक्षा अधिक विद्यार्थ्यांचे उच्चशिक्षण यशस्वीरीत्या पूर्ण झाले. याशिवाय ३० हजारांहून अधिक विद्यार्थ्यांना विविध विषयांवर तसेच २००० हजार युवतींना भावनिक, मानसिक सबलीकरणासाठी प्रशिक्षण देण्यात आले.

१७५ विद्यार्थ्यांची निवड
उद्योग क्षेत्रातील तज्ज्ञ मान्यवरांचे मार्गदर्शन आणि जॉब फेअर, परिसर मुलाखत आणि उद्योजकता विकास शिबिरांचे नियमित आयोजन करून विद्यार्थ्यांना उद्योगाची संधी उपलब्ध करून दिली जात असल्याचे, सुरेश जैन यांनी सांगितले. जैन यांच्या अमृत महोत्सवी वर्षानिमित्त चालू शैक्षणिक वर्षांत एकूण १७५ विद्यार्थ्यांची निवड दत्तक योजनेच्या माध्यमातून करण्याचा निर्णय करण्यात आला आहे. ग्रामीण व शहरी भागातील दहावी, महाविद्यालयीन व स्पर्धा परीक्षा देणाऱ्या विद्यार्थ्यांना अभ्यासासाठी ५० आसनांची अभ्यासिका रत्ना जैन विद्यालय येथे सुरू करण्यात आली आहे.