नृत्य, गायन अन् वादनाचा संगम

स्वरानुभूतीत रसिकांनी अनुभवली जुगलबंदी

म. टा. प्रतिनिधी, जळगाव

देशातील ज्येष्ठ कलावंत, संगीतकार,वाद्यनिर्माते, लेखक यांच्यासह स्थानिककलावंताना हक्काचे व्यासपीठ मिळावे. जळगाव शहरात शास्त्रीय संगीताला प्रोत्साहन मिळावे, यासाठी जैन इरिगेशनचे अध्यक्ष अशोक जैन व अनुभूतीच्या संचालिका निशा जैन यांच्या पुढाकारातून ‘स्वरानुभूती’या संगीत महोत्सवाचे आयोजन केले जात आहे. या निमित्ताने जळगावातील रसिकांना गायन, वादन आणि नृत्य यांची जुगलबंदी अनुभवली.

अनुभूती निवासी शाळेतर्फे पद्मश्री भवरलाल जैन स्मृती संगीत समारंभ-२०१७ अंतर्गत 'स्वरानुभूती पुष्प दुसरे' या संगीत महोत्सवाच्या समारोपाच्या दुसऱ्या दिवसाच्या सत्राचे उद्घाटन ज्ञानपीठ पुरस्कारप्राप्त डॉ. भालचंद्र नेमाडे यांच्याहस्ते कांताई सभागृहात करण्यात आले. कार्यक्रमाचे प्रास्ताविक हर्षल पाटील यांनी केले. यावेळी आर्या शेंदुर्णीकर यांच्या बहारदार कथ्थक नृत्यांने रसिक तृप्त झाले.

कार्यक्रमाच्या आरंभी त्यांनी गणेशवंदना सादर केली. 'अबके सावन घर आ जा' बंदिश, केदार रागातील बंदिश सादर केली. निखिल क्षीरसागर यांचे गायन झाले. त्यांनी रागेश्री रागाने गायनास सुरुवात केली. 'वृंदावनी वेणू वाजे वृंदावनी...' हे भजन सादर करून रसिकांना मोहिनी घातली. आकाश विश्वास यांनी हार्मोनियम वाजविले तर इंदुरचे पंडित कमल कामले यांचे व्हायोलिन वादन झाले. त्यांनी आपला आरंभ राग 'जोग'ने केला. त्यांना अमृतेश मिश्रा यांनी तबल्यावर तर निशांत जैनने तानपुऱ्यावर साथ दिली. जळगावच्या पंडित संजय पत्की यांच्या गायनाने या महोत्सवात रंगत आणली.