जलतरण तलावास मुहूर्त लवकरच

म. टा. प्रतिनिधी, जळगाव

महापालिकेच्या जलतरण तलावाच्या नूतनीकरणाचे काम युद्धपातळीवर सुरू आहे. अत्याधुनिक असलेले हे जलतरण तलाव पुढीलवर्षी दि. २६ जानेवारीपर्यंत जळगावकरांसाठी खुले करण्यात येणार आहे. दरम्यान महापौर ललित कोल्हे, प्रभारी आयुक्त तथा जिल्हाधिकारी किशोरराजे निंबाळकर यांनी सकाळी जलतरण तलावाच्या कामांची पाहणी केली.

मेहरूण परिसरात महानगरपालिकेचे जलतरण तलाव असून, तीन वर्षांपासून बंद स्थितीत होते. त्यामुळे अत्याधुनिक जलतरण तलाव करण्याचे काम सुरू करण्यात आले आहे. जलतरण तलावाच्या कामांची बुधवारी (दि. १३) सकाळी पाहणी केली. यावेळी महापौर ललित कोल्हे, प्रभारी आयुक्त तथा जिल्हाधिकारी किशोरराजे निंबाळकर, नगरसेवक बंटी जोशी यांच्यासह अधिकारी उपस्थित होते.

अत्याधुनिकतेची साथ

मेहरूण येथे अत्याधुनिक जलतरण तलाव करण्यात येत आहे. याठिकाणी एक नवीन बेबी स्विमिंग पूल, १५०० फुटाचे योगा हॉल, एरोबिक्स हॉल, ज्येष्ठ नागरिकांसाठी वॉटर वॉक व इतर व्यायामाच्या सुविधा, एक अॅम्पीथिएटर व रेस्टॉरन्ट असणार आहे. जुन्या फिल्टरेशन प्लान्टऐवजी अत्याधुनिक फिल्टरेशन प्लान्ट, महिला व पुरुषांसाठी स्वतंत्र बाथरुम व चेन्जिंग रुम, भिंतीवर लेजर इफेक्ट, सर्व सुविधांसह सोना बाथ सुविधादेखील असणार आहे. येत्या दि. २६ जानेवारी २०१८ पूर्वी नूतनीकरणाचे काम पूर्ण करण्याची सूचना देण्यात आली आहे.

मेहरूण तलावाच्या बांधाला करण्यात आलेल्या डबर पिचिंग वॉलचीही पाहणी करण्यात आली.