महिलांना सर्वार्थाने सक्षम करण्याचा प्रयत्न

राज्य महिला आयोगाच्या अध्यक्षा रहाटकर यांची ग्वाही

म. टा. प्रतिनिधी, जळगाव

महिलांना सामाजिक, कायदेविषयक व आर्थिकदृष्ट्या सक्षम करण्याचे काम बचटगटांमार्फत सुरू आहे. महिलांना सर्वार्थाने सक्षम करण्यासाठी महिला आयोग प्रयत्नशील असल्याची ग्वाही राज्य महिला आयोगाच्या अध्यक्षा विजया रहाटकर यांनी दिली. त्या प्रज्ज्वला योजनेअंतर्गत जिल्हा दौऱ्यावर आल्या असता त्या अजिंठा शासकीय विश्राम गृहात आयोजित पत्रकार परिषदेत बोलत होत्या.

रहाटकर म्हणाल्या की, बचतगटासह महिलांच्या विकासासाठी फेब्रुवारी २०१९ पासून प्रज्ज्वला योजना सुरू करण्यात आली असून, या अंतर्गत बचतगटातील महिलांना शिबिरांच्या माध्यमातून सक्षम बनविण्यात येत आहे. या शिबीरात महिलांचे हक्क, कायदे, शासकीय योजनांसह विविध माहिती देत बचतगटांना व्यासपीठ उपलब्ध करून देण्यात येत आहे. आतापर्यंत ११ जिल्ह्यांत प्रशिक्षण घेतले असून, जवळपास ५० हजार महिलांना याचा लाभ झाला आहे. महिला सक्षमीकरणासाठी पंढरपूर वारीतही आयोगाची दिंडी सहभागी झाली होती. या दिंडीत महिलांना कायदे, त्यांचे हक्क याबाबत पोस्टर, चलचित्र, विविध क्षेत्रांतील मान्यवरांच्या माध्यमातून मार्गदर्शन करण्यात आले. वारीत सामील दीड लाख महिलांना आयोगाच्या माध्यमातून सॅनिटरी नॅपकिन वाटप करण्यात आले. या दिंडीची दखल प्रधानमंत्री नरेंद्र मोदी यांनी घेत प्रत्यक्ष भेटीसाठी बोलवून देशातील माता-भगिनींसाठी संदेश दिल्याचे त्या म्हणाल्या. महिला आयोगातर्फे शहरात आयोगाचे समुपदेशन केंद्र उभारण्यात येत असल्याची माहिती विजया रहाटकर यांनी दिली. यासंदर्भात महापौर व आयुक्तांना तशा सूचना देण्यात आल्या असून, लवकरच हे समुपदेशन केंद्र कार्यान्वित करण्यात येईल.