राष्ट्रीय योगासन स्पर्धेत तनयला सुवर्ण

खान्देशच्या शिरपेचात आणखी एक तुरा

म. टा. प्रतिनिधी, जळगाव

दिल्ली येथे गेल्या २ ते ९ जानेवारीदरम्यान झालेल्या ६२ व्या राष्ट्रीय शालेय योगासन स्पर्धेत १७ वर्षांखालील गटात जळगावच्या स्टार डान्सर, मास्टर तनय मल्हारा याने सुवर्णपदक पटकावले आहे. त्याने आपले या क्षेत्रातील वर्चस्व पुन्हा एकदा सिद्ध केले. त्याच्या या यशामुळे खान्देशच्या शिरपेचात आणखी एक मानाचा तुरा खोवला आहे.

शालेय स्पर्धेत उंच भरारी घेण्यासाठी त्याला त्याचे आई-वडील डॉ. नलिनी व आनंद मल्हारा यांच्याकडून प्रोत्साहन तर योगशिक्षिका डॉ. अनिता पाटील यांचेकडून मार्गदर्शन मिळाले. योगासनांमुळे आलेला लवचिकपणा त्याचे शरीर अगदी रबरासारखे वाकवतो, याचा प्रत्यय डान्स प्लस २ च्या स्पर्धेत दर्शकांना आला आहे.

सिंगापूरच्या स्पर्धेत सहभाग

जामनेर येथे झालेल्या राज्यस्तरीय योगासन स्पर्धेतून त्याची राष्ट्रीय स्पर्धेसाठी निवड झाली होती. डान्स सोबतच १६ वर्षांच्या तनयने गेल्या तीन वर्षांपासून योगासनावरही लक्ष केंद्रित केले आहे. रिदमिक योगामध्ये त्याने प्राविण्य मिळवले आहे. विश्व जिंकण्याचे त्याचे पुढील ध्येय आहे. तनयने नुकतीच स्टार वाहिनीवरील डान्स प्लस २ ही स्पर्धा जिंकली होती. आंतरराष्ट्रीय स्तरावर येत्या २६ ते ३० जुलैदरम्यान सिंगापूर येथे होणाऱ्या योगासन चॅम्पियनशिप स्पर्धेत तनय भारतातर्फे सहभागी होणार आहे.