पेन्शन योजनेसाठी शिक्षकांचा मोर्चा

तहसीलदारांना मागण्यांचे निवेदन

म. टा. प्रतिनिधी, जळगाव

जिल्ह्यातील शिक्षक बांधवांनी रविवारी (दि. २७) १ नोव्हेंबर २००५ नंतर नियुक्त होणाऱ्या शिक्षकांना निवृत्त वेतन योजना लागू न करणाऱ्या सरकारच्या विरोधात जिल्हाधिकारी कार्यालयावर मोर्चा काढला. या वेळी शिक्षकांनी ‘जुनी पेन्शन योजना, आमच्या हक्काची नाही कुणाच्या बापाची’, ‘जो पेन्शन की बात करेगा, वही देशपे राज करेगा’ अशा घोषणा दिल्या.

महाराष्ट्र राज्य जुनी पेन्शन हक्क संघटनेच्यावतीने रविवारी सकाळी ११.३० वाजता शहरातील डॉ. श्यामाप्रसाद मुखर्जी उद्यानातून मोर्चास सुरुवात झाली. यामध्ये संघटनेचे जिल्हाध्यक्ष गोविंदा ठाकरे, सरचिटणीस सोमनाथ गोंडगिरे, कार्याध्यक्ष संदीप पाटील, उपाध्यक्ष टी. एन. करनकाळ, विजय पाटील, दीपक गिरासे, विवेक पाटील, सल्लागार नाना पाटील, प्रवीण पाटील आदींसह जिल्ह्यातून आलेल्या शिक्षक व शिक्षिकांनी सहभाग घेतला. मोर्चादरम्यान शिक्षकांनी हातात विविध मागण्यांचे फलक घेतले होते. तसेच गांधी टोपी परिधान करून त्यावर आपल्या मागण्यांच्या घोषणा लिहून नागरिकांचे लक्ष वेधून घेतले.

अमरावतीला तीन फेब्रुवारी रोजी मेळावा
जिल्हाधिकारी कार्यालयावर मोर्चा पोहचल्यानंतर मोर्च्याचे रुपांतर सभेत झाले. दरम्यान, येत्या दि. ३ फेब्रुवारी रोजी अमरावती येथे दिल्लीचे मुख्यमंत्री अरविंद केजरीवाल यांच्या उपस्थितीत मेळाव्याचे आयोजन करण्यात आले असून, या मेळाव्यात शिक्षक बांधवांनी मोठ्या संख्येने उपस्थित राहण्याचे आवाहन या वेळी करण्यात आले. यानंतर आपल्या विविध मागण्यासंदर्भात तहसीलदार अमोल निकम यांना निवेदन देण्यात आले.